ირაკლი ოქრუაშვილი ბრალს არ აღიარებს

ირაკლი ოქრუაშვილის ადვოკატი აცხადებს, რომ მისი დაცვის ქვეშ მყოფი ბრალს არ აღიარებს. მამუკა ჭაბაშვილის განცხადებით, ბრალის ოფიციალურად წარდგენის ზუსტ დროზე ინფორმაცია არ აქვს. ბრალის წარდგენის ვადა 27 ივლისს საღამოს იწურება.

მისივე თქმით, ოქრუაშვილი შინაგან საქმეთა სამინისტროს მიერ გავრცელებულ ვიდეომასალასაც გაეცნო და აცხადებს, რომ ძალადობის ორგანიზებას არ ახდენდა. ირაკლი ოქრუაშვილს მისი ადვოკატი დიღმის მთავარ სამმართველოში კიდევ ერთხელ დღეს, დაახლოებით ერთ საათში შეხვდება.

„ჯერჯერობით ირაკლი ოქრუაშვილისთვის ბრალდება არ წარუდგენიათ. როდის გააკეთებენ ამას, ჩემთვის უცნობია. არანაირი მტკიცებულება ჯერ არ გადმოგვცემია. რაც შეეხება ოქრუაშვილის პოზიციას ბრალთან დაკავშირებით, ის ბრალს არ აღიარებს. ოქრუაშვილი დაპატიმრებას პირდაპირ უკავშირებს მის ბოლოდროინდელ გააქტიურებას და „რუსთავი 2“-თან დაკავშირებულ მოვლენებს. მან შსს-ს მიერ გავრცელებული კადრები ნახა. იმ კადრებში არ ჩანს და არ დასტურდება, რომ ირაკლი ოქრუაშვილი ძალადობას უწევს ორგანიზებას“, - განაცხადა მამუკა ჭაბაშვილმა.

შსს-ს ინფორმაციით, ირაკლი ოქრუაშვილი ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით არის დაკავებული.

20-21 ივნისს განვითარებულ მოვლენებთან დაკავშირებით მაგისტრატი მოსამართლის თანდასწრებით ირაკლი ოქრუაშვილი 23 ივლისს მოწმის სტატუსით გამოიკითხა.

20 ივნისს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა შტურმით სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი დაკარგა.

რუსთაველის გამზირზე საპროტესტო აქციები მას შემდეგ დაიწყო, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 

20-21 ივნისის აქციების საქმის გამოძიების დასრულებამდე შსს-ს განსაკუთრებულ დავალებათა დეპარტამენტის უფროსს უფლებამოსილება შეუჩერდა.