ბიძინა გეგიძე ანტიკორუფციული სააგენტოს მისდამი ინტერესს პოლიტიკას უკავშირებს

უმრავლესობის წევრმა, დეპუტატმა ბიძინა გეგიძემ ბრიფინგზე განმარტა თუ რასთან დაკავშირებით დაიბარა სუს-მა ის მოწმის სახით გამოკითხვაზე. მისი თქმით, კითხვები ეხება „საქართველოს ფოსტას“, სადაც ის დეპუტატობამდე მუშაობდა. როგორც გეგიძე აღნიშნავს, საქმეში პოლიტიკურ ხაზს ხედავს, რადგან ის ხაზარაძისა და კვირიკაშვილის პოლიტიკურ გუნდში მოიაზრება. 

„საკითხი ეხება ჩემს იმ საქმიანობას, სანამ პარლამენტის წევრი გავხდებოდი. ეს არის „საქართველოს ფოსტა“ - იქ მე დირექტორის მოადგილე ვიყავი. აქედან გამომდინარე გამაჩნდა კონკრეტული პასუხისმგებლობები და ჩემს საქმიანობას ჩემი კომპეტენციის ფარგლებში ვახორციელებდი. ამის შემდეგ გავხდი პოლიტიკოსი - ვაკის მაჟორიტარი, შემდგომ ფრაქციის თავმჯდომარე და შემდგომ - პარტია „ქართული ოცნების“ პოლიტსაბჭოს წევრი. გამოძიება 2018 წლის ზაფხულში დაიწყო - მაშინ, როდესაც პოლიტიკურად საკმაოდ აქტიური ვიყავი ამ რეგალიებიდან გამომდინარე.

პარალელურად, გადადგა პრემიერი გიორგი კვირიკაშვილი, ჩემი მეგობარი. კვირიკაშვილი ივნისის შუა რიცხვებში გადადგა და გამოძიება 2 აგვისტოს დაიწყო. მიუხედავად იმისა, ვინ რას ფიქრობს, აქ არის პოლიტიკური ფაქტორი, მარტივად იმის გამო, რომ ვარ პოლიტიკოსი და ეს გამოძიება დაიწყო ჩემი აქტიური პოლიტიკური მოღვაწეობის დროს და ლოგიკურია, რომ 2018 წლის ზაფხულში დაწყებული პროცესი ჩემს პოლიტიკურ საქმიანობას უკავშირდებოდეს. სამართლებრივად, ჩემი სამსახურებრივი თემა მოიძებნა, რომელიც კონკრეტულად რას ეხება, მეცოდინება მას შემდეგ, როცა სუს-ის ანტიკორუფციულ სააგენტოში მივალ", - განაცხადა გეგიძემ. 

უმრავლესობის წევრი დეპუტატი ბიძინა გეგიძე სახელმწიფო უსაფრთხოების სამსახურში გამოკითხვაზე დღეს, 11:00 საათზე იყო დაბარებული, თუმცა ის უწყებაში არ მივიდა.

როგორც სახელმწიფო უსაფრთხოების სამსახურში აცხადებენ, საქმეზე გამოძიება, რომლის ფარგლებში ბიძინა გეგიძე მოწმის სახით გამოკითხვის მიზნით უწყებაში იყო დაბარებული, ანტიკორუფციულ სააგენტოში 2018 წლის 2 აგვისტოდან მიმდინარეობს.

ბიძინა გეგიძე 2014-2016 წლებში „საქართველოს ფოსტის“ გენერალური დირექტორის მოადგილე იყო.