იუსტიციის სამინისტრო: რამზან ახიადოვს რუსეთში ექსტრადირებით საფრთხე არ ემუქრება

იუსტიციის სამინისტრო 2019 წლის 19 სექტემბერს საქართველოდან რუსეთის მოქალაქის, ინტერპოლით ძებნილი რამზან ახიადოვის რუსეთში ექსტრადირებასთან დაკავშირებით, „მაღალი საზოგადოებრივი ინტერესიდან გამომდინარე და პოლიტიკური სპეკულაციების თავიდან ასაცილებლად“, დამატებით ინფორმაციას ავრცელებს.

უწყება განმარტავს, რომ 2019 წლის 19 სექტემბერს ქართულმა მხარემ ტერორისტული დანაშაულებისათვის ინტერპოლით ძებნილი, რუსეთის ფედერაციის მოქალაქის რამზან ახიადოვის რუსეთში ექსტრადირება განახორციელა, რითიც ქართულმა მხარემ გაითვალისწინა ტერორიზმის დანაშაულთან ბრძოლის საერთაშორისო პრიორიტეტი, ინტერპოლის წინაშე არსებული ვალდებულებები, ასევე სტრასბურგის სასამართლოს პრეცედენტული სამართალი და სტანდარტი. 

„კერძოდ, ადამიანის უფლებათა ევროპული სასამართლოს დადგენილი პრეცედენტია, მათ შორის, შამაევისა და სხვების ცნობილ საქმეზე, რომ რუსეთის გენერალური პროკურატურის წერილობითი სამართლებრივი გარანტიების დამაჯერებლობაში ეჭვის შეტანის საფუძველი არ არსებობს“, - ნათქვამია უწყების განცხადებაში, სადაც ასევე აღნიშნულია, რომ მაღალი საზოგადოებრივი ინტერესიდან გამომდინარე და პოლიტიკური სპეკულაციების თავიდან ასაცილებლად, რამზან ახიადოვთან დაკავშირებით დამატებით ინფორმაციას აქვეყნებენ.

„​რამზან ახიადოვს ბრალად ედება ის, რომ 2013 წელს სირიის არაბულ რესპუბლიკაში გაემგზავრა, სადაც გაწევრიანდა ამავე სახელმწიფოს ტერიტორიაზე მოქმედ საერთაშორისო ტერორისტული ორგანიზაცია „ისლამურ სახელმწიფოში“ (ISIS) და 2015 წლის თებერვლის ჩათვლით, მის საქმიანობაში მონაწილეობდა. ის იბრძოდა სირიის სახელმწიფოს სამთავრობო ჯარების წინააღმდეგ სამხედრო მოქმედებებში. რამზან ახიადოვი, შეიარაღებული ფორმირების სხვა წევრებთან ერთად, „ისლამური სახელმწიფოს“ კონტროლქვეშ არსებული ტერიტორიების ე.წ. საზღვრებზე განთავსებულ პოსტებს იცავდა. 

​ასევე, 2015 წლის მარტიდან 2015 წლის ივლისამდე პერიოდში, რამზან ახიადოვი, რომელიც მოცემული დროისთვის კვლავ საერთაშორისო ტერორისტული ორგანიზაცია „ისლამური სახელმწიფოს“ წევრი იყო,  თურქეთის რესპუბლიკაში იმყოფებოდა“, - ნათქვამია განცხადებაში. 

იუსტიციის სამინისტროს ცნობით, ახიადოვი „ისლამური სახელმწიფოს“ ერთ-ერთი ლიდერის მითითებების შესაბამისად მოქმედებდა, რის საფუძველზეც ჩეჩნეთში უკანონო შეიარაღებული ფორმირება შეექმნა. ასევე, ახიადოვი დაჰპირდა ა.ი.-ს დაფინანსებითა და თანამედროვე ცეცხლსასროლი იარაღით უზრუნველყოფას, რა გზითაც ხელი შეუწყო „ისლამური სახელმწიფოს“ რიგების შევსებას. 

​რამზან ახიადოვი 2018 წლის 26 სექტემბრიდან ინტერპოლით იძებნებოდა, რადგან მას რუსეთში ბრალად ედება ტერორისტული ორგანიზაცია „ისლამური სახელმწიფოს“ საქმიანობაში მონაწილეობა და ამ ორგანიზაციაში წევრობისთვის პირების გადაბირება.

​საქართველოს სამართალდამცავმა ორგანოებმა რამზან ახიადოვი რუსეთში ექსტრადიციის მიზნით 2018 წლის 20 დეკემბერს დააკავეს. სასამართლო პროცესების შემდეგ, 2019 წლის 30 ივლისს საქართველოს გენერალური პროკურატურის მოთხოვნის საფუძველზე, რუსეთის გენერალურმა პროკურატურამ გასცა გარანტია, რომლის თანახმადაც, ახიადოვის უსაფრთხოება დაცული იქნება.  

​ექსტრადიციის საქმის განხილვის პარალელურად, ახიადოვმა თავშესაფარი საქართველოში ითხოვა, რაზეც შსს-სგან უარი მიიღო. 

​„რამზან ახიადოვს, მიუხედავად იმისა, რომ ამისათვის საკმარისი დრო ჰქონდა, მისი ექსტრადიციის შესახებ გადაწყვეტილება სტრასბურგის სასამართლოში არ გაუსაჩივრებია და ექსტრადიციის შეჩერება არ მოუთხოვია“, - ნათქვამია განცხადებაში.

ეროვნებით ჩეჩენი, რუსეთის ფედერაციის მოქალაქე რამზან ახიადოვი საქართველომ რუსეთს 19 სექტემბერს გადასცა. ამ ფაქტს ოპოზიციის წარმომადგენლები აკრიტიკებენ და აღნიშნავენ, რომ ეს შემაშფოთებელია, რადგან მის სიცოცხლეს შესაძლოა საფრთხე დაემუქროს. 

რამზან ახიადოვი საქართველოში 2017 წლიდან ცხოვრობდა. ის 9 თვის წინ, ქუთაისში, მანქანის არასწორი პარკირებისას გააჩერეს. პოლიციამ მაშინ გაარკვია, რომ ახიადოვი ინტერპოლით ძებნილი იყო. მას შემდეგ, ის რუსთავის N6 დაწესებულებაში იმყოფებოდა.