შსს: „ღამის მგლების“ 1 წევრი თბილისში ამოსაცნობი ატრიბუტიკის გარეშე აპრილში ჩამოვიდა

შინაგან საქმეთა სამინისტროს ადასტურებს საქართველოში რუსი ბაიკერების ჯგუფის "ღამის მგლების" ერთი წევრის ყოფნას და აცხადებს, რომ აღნიშნული პირი, აპრილში "ამოსაცნობი ატრიბუტიკის გარეშე" ჩამოვიდა. ინფორმაციას სააგენტო ipn ავრცელებს.

"სოციალურ ქსელში ე.წ. "ღამის მგლებთან" დაკავშირებით გავრცელებული ინფორმაციის შესახებ, გაცნობებთ, რომ გუშინ ღამით ბაიკერების - ე.წ. "ღამის მგლების" 50-იან კაციან ჯგუფს საქართველოს სახელმწიფო საზღვრის გადმოკვეთაზე უარი ეთქვათ. შსს კვლავ ინარჩუნებს ამ პოზიციას. 

აღსანიშნავია, რომ ყოველდღიურად, მშვიდობიანი, ტურისტული ან ტრანზიტული მიზნებით, ათობით ბაიკერი კვეთს ქვეყნის საზღვარს. შესაბამისად, კონკრეტული მომენტისთვის შსს-ს არ გააჩნდა საფუძველი აღნიშნული პირის საქართველოში არშემოშვებისთვის. 

შსს იღებს ყველა ზომას, რომ ამ პირის საქართველოში ყოფნასთან დაკავშირებით, ადგილი არ ჰქონდეს ნებისმიერი ხასიათის ინციდენტს", - განაცხადეს შინაგან საქმეთა სამინისტროში.

2 მაისს, თბილისში "ღამის მგლების" თბილისში ჩამოსვლის აკრძალვის მოთხოვნით პეტიციაც გავრცელდა, რომელსაც ათასობით ხელმომწერი ჰყავს.

"ღამის მგლები" საქართველოში 2015 წელსაც გამოჩნდნენ. მაშინ მათი ვიზიტის დროს ქართველმა ბაიკერებმა ​ვაკის პარკთან მორიგეობა მოაწყვეს, სადაც ტრადიციულად, მეორე მსოფლიო ომში გამარჯვების დღისადმი მიძღვნილი საზეიმო ღონისძიებები იმართება, რათა პარკში ისინი არ შეეშვათ.

ამ დაჯგუფების შეშვებაზე უარი თქვა პოლონეთმაც.