ოქრუაშვილს ბუტა რობაქიძის საქმეზე პატიმრობა შეეფარდა

„გამარჯვებული საქართველოს“ ლიდერი, ირაკლი ოქრუაშვილი პატიმრობაში რჩება. სასამართლოს გადაწყვეტილებით, წინასასამართლო სხდომა 9 იანვარს გაიმართება.  

„თუ 24 ნოემბრამდე ირაკლი ოქრუაშვილს ბუტა რობაქიძის საქმეზე ბრალს ვერ წარვუდგენდით, ვერასდროს წარვუდგენდით,“ ამის შესახებ საქმის პროკურორმა, ლაშა კოტრიკაძემ განაცხადა, რომლის თქმითაც, მიუხედავად იმისა, რომ ოქრუაშვილს ბრალის დადგენილებაზე ხელი არ მოუწერია, ბრალდება ოფიციალურად წარდგენილად ითვლება

მისი თქმით, ოქრუაშვილის მხარდამჭერების მხრიდან იმის თქმა, რომ საქმის ხანდაზმულობის ვადა ორ დღეში გადის სიმართლეს არ შეესაბამება, რადგან ბრალი უკვე წარდგენილია და შესაბამისად სისხლის სამართლებრივი დევნა მის მიმართ უკვე დაწყებულია, რაც საქმეს ხანდაზმულობის ვადას ავტომატურად უხსნის. კოტრიკაძის ინფირმაციით ოქრუაშვილს უკვე დაენიშნა სახაზინო ადვოკატი, თავდაცვის ყოფილი მინისტრის ინტერესებს ელდარ გვალია დაიცავს. მას საქმის მასალები უკვე გადაეცა. ოქრუაშვილი დღეს სასამართლო პროცესს არ ესწრება: 

პარტია „გამარჯვებული საქართველოს“ დამფუძნებლის ირაკლი ოქრუაშვილისა და ყოფილი გენერალური პროკურორის, ზურაბ ადეიშვილის სასამართლო პროცესი დღეს 15:00 საათზე დაიწყო. მანამდე პროცესის გადადების მიზეზი კი სხდომაზე ირაკლი ოქრუაშვილის გამოუცხადებლობა გახდა. გარდა ამისა, სასამართლო დარბაზში არ იმყოფებოდა ოქრუაშვილის უფლებადამცველიც.

ირაკლი ოქრუაშვილს, ამ ეტაპზე, უფლებადამცველი არ ჰყავს. როგორც ცნობილია, წინა ხელისუფლების მთავრობის კაბინეტის წევრი, საკუთარ ადვოკატთან გარკვეულ საკითხებზე ვერ შეთანხმდა, რის გამოც მოხდა საქმიდან მისი აცილება. თავდაცვის ყოფილმა მინისტრმა პენიტენციური განყოფილებიდან სასამართლოს განცხადებით მიმართა, რომლის მიხედვითაც ის სხდომის გადადებას და საქმის მასალების გასაცნობად გონივრულ ვადას ითხოვდა.

სახელმწიფო ბრალდების განცხადებით, ირაკლი ოქრუაშვილის მიმართვა იმის შესახებ, რომ არ იცის, რაში სდებენ ბრალს, სიმართლეს არ შეესაბამება. ვინაიდან მისთვის ცნობილია, თუ რა საქმეზე წარედგინა ბრალი. ცნობისთვის, ირაკლი ოქრუაშვილსა და ზურაბ ადეიშვილს ახალი ბრალი რამდენიმე დღის წინ წაუყენეს. ორივე მათგანს ბუტა რობაქიძის საქმეზე სამსახურეობრივი უფლებამოსილების ბოროტად გამოყენებას ედავებიან. აღნიშნულ საქმეს ხანდაზმულობის ვადა 24 ნოემბერს ეწურება.

უფლებამოსილების ბოროტად გამოყენების ფაქტზე შინაგან საქმეთა ყოფილ მინისტრსა და ყოფილ გენერალურ პროკურორს ბრალი 19 ნოემბერს წარუდგინეს.

ბუტა რობაქიძის საქმე მთავარმა პროკურატურამ 2012 წელს გახსნილად გამოაცხადა. ხელახალი გამოძიების შედეგად დადგინდა, რომ 19 წლის ბუტა რობაქიძის სიცოცხლე სამართალდამცველის, გიორგი ბაშალეიშვილის მიერ შემთხვევით გასროლილმა ტყვიამ იმსხვერპლა. ბუტა რობაქიძე თბილისში, აკ. წერეთლის გამზირზე 2004 წლის 24 ნოემბერს მოკლეს.

ექსპერტიზით დადგინდა, რომ მომხდართან დაკავშირებით გავრცელებული ვიდეოჩანაწერი დამონტაჟებულია და მასზე 36 წყვეტა ფიქსირდება, რაც ბრალდების პოზიციას ამყარებს. ვიდეოკადრების გაყალბების ერთ-ერთ სავარაუდო ავტორად გურამ დონაძე სახელდება.

სასამართლომ ბუტა რობაქიძის საქმეზე ყოფილი მაღალჩინოსნები დავით იაშვილი, გურამ დონაძე, ზურა მიქაძე, ირაკლი ფირცხალავა და ზაზა ბაქრაძე დამნაშავედ ცნო.