ბექა ბასილაიამ და ირაკლი ნადირაძემ დროებითი მოთავსების იზოლატორი დატოვეს

18 ნოემბერს პარლამენტთან აქციაზე დაკავებულმა აქტივისტმა და ადვოკატმა ბექა ბასილაიამ გორის დროებითი მოთავსების იზოლატორი დატოვა. სასამართლოს გადაწყვეტილებით, სასჯელის სახით მას 13-დღიანი პატიმრობა ჰქონდა განსაზღვრული.

პოლიციის შენობასთან მას ახლობლები, მოძრაობა „სირცხვილიას“ აქტივისტები და „ნაციონალური მოძრაობის“ ადგილობრივი ორგანიზაციის წევრები დახვდნენ. ბასილაია ბრძოლის გაგრძელებას აპირებს. მან ბოლო პერიოდში დაკავებულებს სოლიდარობა გამოუცხადა და აღნიშნა, რომ მალე სამართლებრივი პასუხისმგებლობის აღება „ქართული ოცნების“ ლიდერს, ბიძინა ივანიშვილს მოუწევს.

გვიან ღამით დატოვა მცხეთის დროებითი მოთავსების იზოლატორი 18 ნოემბერს დაკავებულმა ირაკლი ნადირაძემ, რომელსაც ასევე 13-დღიანი პატიმრობა ჰქონდა მისჯილი. იზოლატორთან მას „ნაციონალური მოძრაობის“ წევრები და ახლობლები დახვდნენ. როგორც ირაკლი ნადირაძემ განაცხადა, ბრძოლა გაგრძელდება გამარჯვებამდე. 

18 ნოემბერს სპეცრაზმმა პარლამენტის შესასვლელებს ბოქლომები მოხსნა და ბარიკადებისგან გაათავისუფლა, ასევე რუსთაველის გამზირი კარვებისგან გაწმინდა. სამართალდამცველებმა ადმინისტრაციული სამართალდარღვევის ფაქტზე სულ 37 ადამიანი დააკავეს. 

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. მათ შორის იყო მარიამ ჯაშიც.

მოგვიანებით, მმართველი გუნდი რუსთავის მაჟორიტარმა, გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.