თავდაცვის სამინისტრო მახათას მთაზე სამხედრო ქალაქს ააშენებს

საქართველოს თავდაცვის სამინისტრო ახალი საბინაო პოლიტიკის განხორციელებას იწყებს. ამის შესახებ თავდაცვის მინისტრმა ირაკლი ღარიბაშვილმა სპეციალურ ბრიფინგზე განაცხადა. მისი თქმით, მახათას მთაზე სამხედრო ქალაქი აშენდება, სადაც სამხედრო მოსამსახურეები საცხოვრებელი ფართის შეძენას უპრეცედენტო შეღავათიანი პირობებით შეძლებენ.

ღარიბაშვილმა აღნიშნა, რომ ახალი პროექტის მიხედვით, სამხედრო მოსამსახურეებს ფინანსური ვალდებულებები მაქსიმალურად შეუმსუბუქდებათ.

„თუ მათ უწევდათ ღირებულების 60%-ის დაფარვა, ახალი პირობებით, 50%-იანი თანამონაწილეობის პრინციპი მოქმედებს. კერძო კომპანიის ნაცვლად მშენებლობას ჩვენი უწყების სამშენებლო კომპანია განახორციელებს, რაც მნიშვნელოვნად შეამცირებს თვითღირებულებას. საცხოვრებელი ფართის კვადრატული მეტრის სავარაუდო ღირებულება დაახლოებით 200 დოლარი იქნება. შესაბამისად, სამხედროებს ერთ კვადრატულ მეტრში დაახლოებით 100 დოლარის გადახდა მოუწევთ“, - განაცხადა მინისტრმა.

მისივე თქმით, ამ თანხის გადასახდელად სამხედროები სრულიად უპროცენტო შიდა განვადებით ისარგებლებენ. ამ ეტაპზე პროექტი შეეხება 1000-ზე მეტ სამხედრო მოსამსახურეს. პროექტი მომავალშიც გაგრძელდება.