პროკურორი: განაჩენით დასტურდება, რომ დავით სარალიძეს ჭრილობა ბასრი საგნის გამოყენებით, მიხეილ კალანდიამ მიაყენა

როგორც მოგეხსენებათ, დღევანდელ სხდომაზე სასამართლომ გამოაცხადა განაჩენი, აწ უკვე მსჯავრდებულ მიხეილ კალანდიას სისხლის სამართლის საქმეზე, რა დროსაც სასამართლომ სრულად გაიზიარა ბრალდების მხარის მიერ წარმოდგენილი და გამოკვლეული მტკიცებულებები, - ამის შესახებ ხორავას საქმის პროკურორმა, ბესო ქვარცხავამ სასამართლოს მიერ განაჩენის გამოცხადების შემდეგ ჟურნალისტებს განუცხადა.  

მისი თქმით, მსჯავრდებული მიხეილ კალანდია სასამართლომ დამნაშავედ ცნო წარდგენილ ბრალდებაში, რაც განზრახ მკვლელობას გულისხმობს, ჩადენილს ჯგუფურად, წინასწარი შეცნობით არასრულწლოვნის მიმართ.

„მსჯავრდებულის მიმართ სასამართლომ სასჯელის სახედ და ზომად გამოიყენა თავისუფლების აღკვეთა 11 წლისა და 3 თვის ვადით. რაც შეეხება მტკიცებულებებს, ბრალდების მხარის მიერ, დაახლოებით 9 თვის განმავლობაში, წარმოდგენილი და გამოკვლეული იქნა 150-მდე მოწმის ჩვენება. ასევე წარმოდგენილი იქნა ათეულობით ნივთიერი მტკიცებულება და ასეულობით წერილობითი მტკიცებულება. შესაბამისად, სასამართლომ ბრალდების მხარის მიერ წარმოდგენილი ყველა ზემოთხსენებული მტკიცებულება სრულად გაიზიარა და ბრალდებულის მიმართ გამამტყუნებელი განაჩენი დაადგინა“ - განაცხადა ხორავას საქმის პროკურორმა. 

პროკურორის განცხადებით, ოჯახისა და დაცვის მხარის მიერ გაკეთებული განცხადებები, რომელიც სხვადასხვა პოლიტიკურ სპეკულაციას ეხება, სამართლებრივ ჩარჩოებს სცდება და ამ სიღრმეში არ შევლენ.

„აღნიშნული განაჩენით დადასტურდა, რომ მსჯავრდებული მ.კ. იყო აღმსრულებელი, თანააღმსრულებელი და ჯგუფის მეორე წევრთან ერთად მან ჩაიდინა განზრახ მკვლელობა, სწორედ ამაში ედებოდა მას ბრალი. ჩვენ უნდა დაველოდოთ სასამართლოს განაჩენში მითითებულ მოტივაციას, შემდეგ შეგვიძლია დანარჩენ გარემოებებზე მსჯელობა. აღნიშნული განაჩენით დასტურდება, რომ ჭრილობა ბასრი საგნის გამოყენებით მსჯავრდებულმა მიაყენა დავით სარალიძეს“, - განაცხადა ბესო ქვარცხავამ. 

დავით სარალიძის განზრახ ჯგუფურად მკვლელობის ბრალდებით დაკავებულ მიხეილ კალანდიას 11 წლით და 3 თვით თავისუფლების აღკვეთა მიესაჯა. გადაწყვეტილება თბილისის საქალაქო სასამართლოს მოსამართლე ნიკოლოზ მარსაგიშვილმა გამოაცხადა.

მიხეილ კალანდია სამართალდამცველებმა 4 ივნისს დააკავეს. მას აღკვეთის ღონისძიების სახით პატიმრობა 6 ივნისს შეეფარდა.

2017 წლის პირველ დეკემბერს თბილისის ცენტრში, ვერაზე ორი არასრულწლოვანი, დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებით საავადმყოფოში მოთავსებიდან მეორე დღეს, 2 დეკემბერს გარდაიცვალა.