პროკურორატურა დეკანოზის საქმეში ინტიმური ვიდეომასალის არსებობას უარყოფს

დეკანოზის  საქმის პროკურორის, ჯარჯი წიკლაური  უარყოფს ადვოკატების გავრცელებულ ინფორმაციას, რომ დეკანოზის საქმეში ინტიმური ვიდეო მასალა არსებობს.  

„უკვე მერამდენედ, ადვოკატების მხრიდან ჩვენი შუამდგომლობების დამახინჯება ხდება და ისინი სიცრუეს ტირაჟირებენ. ეს არის სიცრუე. ინტიმური ვიდეომასალა არ არსებობს. ჩვენ ვსაუბრობთ იმაზე, რომ საქმეში არის გარკვეული სახის პირადი ინფორმაცია ბრალდებული გიორგი მამალაძის და მესამე პირების“, - განაცხადა პროკურორმა ჯარჯი წიკლაურმა ადვოკატ გიორგი ფანცულაიას გამოსვლის პასუხად, რომელმაც ბრალდების მხარე პირადი ცხოვრების ამსახველი ვიდეომასალით დაშანტაჟებაში დაადანაშაულა. 

წიკლაურის თქმით, საუბარია გარკვეული ხასიათის პირადი ცხოვრების ინფორმაციაზე, რომელიც არის საქმეში.

პროკურორი ასევე გამოეხმაურა დეკანოზის განცხადებას მის დაკავებასთან დაკავშირებითაც. „მისი დაკავება და პირადი ჩხრეკა მოხდა კანონიერად და შენიშვნა მას არ ჰქონდა. ეს ნახა მოსამართლემაც. ბრალდებული ყოველ სხდომაზე ახალ ინფორმაციას იგონებს და ეს მისი სტრატეგიაა, რომ ეჭვქვეშ დააყენოს ჩვენი მტკიცებულებები“, - განაცხადა პროკურორმა.

დეკანოზმა გიორგი მამალაძემ სასამართლო პროცესზე დაკავებისას მისი უფლებების დარღვევაზე ისაუბრა. მან განაცხადა, რომ ჩხრეკა არ ჩაუტარებიათ აეროპორტში. ასევე დაკავებისას არ განუმარტეს, ვისი მკვლელობის მომზადება ედებოდა ბრალად. 

ამ წუთებში მოსამართლე მოსაფიქრებლადაა გასული, რომ საქმის დახურვასთან დაკავშირებით გადაწყვეტილება გამოიტანოს. საქმის დახურვას ბრალდების მხარე ითხოვს.