მოწმეების ინფორმაციით, ლუკა სირაძის დაკითხვა მარიანა ჩოლოიანის მხრიდან უფლებამოსილების გადამეტებით მიმდინარეობდა

საქალაქო სასამართლომ 15 წლის მოზარდის, ლუკა სირაძის გარდაცვალების საქმეზე დაკავებული გამომძიებლის, მარიანა ჩოლოიანის საქმე განიხილა. დღევანდელ პროცესზე ბრალდების ორი მოწმე - „მწვანე სკოლის“ სასწავლო ნაწილის გამგე და პედაგოგი დაიკითხნენ.

პროკურორის, ლევან ქუთათელაძის განცხადებით, მოწმეებმა გარდაცვლილი ლუკა სირაძე დაახასიათეს, მათ ასევე ისაუბრეს განყოფილებაში მისი დაკითხვის დეტალებზე და აღნიშნეს, რომ, მათი ინფორმაციით, დაკითხვა მიმდინარეობდა ბრალდებულის მხრიდან უფლებამოსილების გადამეტებით.

„დღევანდელ სხდომაზე ბრალდესნის მხარის ორი მოწმე დაიკითხა. მათ ისაუბრეს გარდაცვლილ ლუკა სირაძის პიროვნების შესახებ და დაახასიათეს დადებითად. ასევე მათ ისაუბრეს პოლიციაში განვითარებულ მოვლენებზე, როგორც ირიბმა მოწმეებმა და დაადასტურეს, რომ განყოფილებაში განხორცილედა არასრულწლოვნის მიმართ ჩვენების მიცემა იძულების მიზნით და ფსიქოლოგიური ზემოქმედება. მომწეებმა ეს ინფირმაცია გაიგეს იმ პირებისგან, რომლებიც უშუალოდ იქ იმყოფებოდნენ, თუმცა მოვერიდები და ვერ დაგისახელებთ კონკრეტულ პიროვნებას იმის გათვალისწინებით, რომ სხდომები მიმდინარეობს დახურულ რეჟიმში. ასევე მოწმეებმა დაადასტურეს, რომ სკოლის მოხატვასთან დაკავშირებით გარკვეული შეხვედრა მოხდა, ერთი მხრივ, პოლიციელების, მეორე მხრივ სკოლის წარმომადგენლებისა და ასევე არასრულელოვანი სკოლის მოსწავლეების მონაწილეობით, მათი კანონიერი წარმომადგენლების მონაწილეობის გარეშე. როგორც აქამდე გამოკვლეული მტკიცებულებები და მიცემული ჩვენებები, ასევე მტკიცებულებები რომლებიც დღეის შემდეგ განიხილება, ცალსახად დაადასტურებენ, რომ მარიანა ჩოლოიანმა ნამდვილად ჩაიდინა ჩვენების იძულების ორი ეპიზოდი“, - აღნიშნავს პროკურორი.

რაც შეეხება დაცვის მხარეს, ადვოკატი გაგი მოსიაშვილი ამბობს, რომ პედაგოგები არ ფლობდნენ ზუსტ ინფორმაციას, თუ რა ვითარებაში მიმდინარეობდა ლუკა სირაძის დაკითხვა, პროკურატურამ კი დღემდე ვერ წარმოადგინა მოწმეები, რომლებიც ბრალდებული, მარიანა ჩოლოიანის ბრალეულობას დაადასტურებდნენ.

2019 წლის 12 დეკემბერს 15 წლის მოზარდმა ლუკა სირაძემ პოლიციაში გამოკითხვის შემდეგ თვითმკვლელობა სცადა. შემთხვევას წინ უძღოდა „მწვანე სკოლაში“ მომხდარ ინციდენტთან დაკავშირებით მოზარდის პოლიციის განყოფილებაში მოწმის სახით დაკითხვა. ადვოკატის თქმით, მოზარდზე დაკითხვის დროს ფსიქოლოგიური ზეწოლა განხორციელდა. მოზარდის ჯანმრთელობის მდგომარეობა, ექიმების შეფასებით უკიდურესად მძიმე იყო. მას 17 დეკემბერს 20:10 საათზე გაუჩერდა გული.

გამომძიებელი მარიანა ჩოლოიანი, ჩვენების მიცემის იძულების ბრალდებით დააკავეს. საიას ინფორმაციით, მოზარდის საქმეზე დაკავებული გამომძიებელი ყინწვისის სპეცოპერაციის გამოძიებაშიც ფიგურირებს.