პროკურატურამ ლაგოდეხის ნაკრძალში მომხდარ შემთხვევასთან დაკავშირებით სკოლა „ალბიონის“ პედაგოგებს გულგრილობის ფაქტზე, რამაც ადამიანის სიცოცხლის მოსპობა გამოიწვია, ბრალდება წარუდგინა

საქართველოს პროკურატურამ სკოლა„ალბიონის“ ყოფილ და მოქმედ პედაგოგებს - ნ.ს.-ს და ვ.ქ.-ს ბრალი გულგრილობის ფაქტზე წარუდგინა, რამაც ადამიანის სიცოცხლის მოსპობა გამოიწვია. საქმე 2019 წლის 26 მაისს, სასკოლო ექსკურსიაზე ლაგოდეხის ნაკრძალში ნინოსხევის ჩანჩქერზე 16 წლის მოზარდის გარდაცვალების ფაქტს ეხება.

„დანიშნულების ადგილზე ჩასვლისას, პედაგოგებისთვის, მათ შორის ნ.ს-სთვის და ვ.ქ.-სთვის ცნობილი გახდა, რომ მეტეოროლოგიური პირობების გამო მდინარე იყო ადიდებული, სწრაფი დინებით გამოირჩეოდა და ჩანჩქერზე არსებობდა სახიფათო მდგომარეობა. პედაგოგებისთვის ასევე ცნობილი იყო, რომ მოსწავლე სოფიო ნიკოლეიშვილი აპირებდა საბანაოდ ჩანჩქერში შესვლას. მიუხედავად ამისა, ნ.ს. მხოლოდ სიტყვიერი გაფრთხილებით შემოიფარგლა, გამოიჩინა გულგრილობა და მოსწავლეებს ნება დართო სვლა გაეგრძელებინათ ,,ნინოსხევის“ ჩანჩქერის მიმართულებით, თავად კი ჩანჩქერზე არ ავიდა, ხოლო პედაგოგმა ვ.ქ.-მ ნაკრძალის რეინჯერის უშუალო გაფრთხილების მიუხედავად, რომ საფრთხე არსებობდა, იმ საფუძვლით, რომ კარგად იცნობდა მიმდებარე ტერიტორიას და არაერთხელ იყო ნამყოფი, თავად აიღო პასუხისმგებლობა გაძღოლოდა მოსწავლეთა ჯგუფს და აეყვანა ჩანჩქერზე. ჩანჩქერზე ასვლის შემდეგ, პედაგოგების მიერ გამოჩენილი გულგრილობის და წინდახედულობის ნორმების უგულებელყოფის შედეგად უმეთვალყურეოდ დარჩენილი სოფიო ნიკოლეიშვილი ჩანჩქერის სწრაფ დინებაში შევიდა და ვეღარ მოახერხა ნაპირზე დაბრუნება, რამაც მისი გარდაცვალება გამოიწვია“, - ნათქვამია უწყების მიერ გავრცელებულ განცხადებაში.

ბრალდება სასჯელის სახით თავისუფლების აღკვეთას 2-დან 5 წლამდე ვადით ითვალისწინებს. ამასთან, საქართველოს პროკურატურა სკოლა „ალბიონის“ ადმინისტრაციას მიმართავს თხოვნით ვ.ქ.-სთვის პედაგოგიური საქმიანობის შეჩერების თაობაზე. ნ.ს. კი პედაგოგიურ საქმიანობას აღარ ეწევა.