კომპანია „ზეგ“-ის დირექტორი: თამარ ბაჩალიაშვილი ხშირად ამბობდა, რომ სწავლისა და ორ სამსახურში მუშაობის შეთავსება უჭირდა

კომპანია „ზეგ“-ის დირექტორი, თამარ კობერიძე აცხადებს, რომ 23 წლის თამარ ბაჩალიაშვილი კომპანიაში პროგრამისტად მუშაობდა, თუმცა სამსახურიდან წასვლას გეგმავდა. მისივე თქმით, ბაჩალიაშვილი ხშირად ამბობდა, რომ სწავლისა და ორ სამსახურში მუშაობის შეთავსება უჭირდა.

„კომპანიაში არანაირი პრობლემა არ ჰქონდა. უკონფლიქტო, ძალიან მორიდებული და კარგი გოგო იყო. ვიცოდი, რომ სამსახურიდან შეიძლებოდა წასულიყო, რადგან ბოლო დღეებში ბევრჯერ უთქვამს, რომ ორ სამსახურში მუშაობდა, თან სწავლობდა და ბევრი დრო აღარ ჰქონდა. შესაბამისად, ჩემთვის მოულოდნელი არ ყოფილა იმის გაგება, რომ მიდიოდა“, - აცხადებს თამარ კობერიძე.

„თამარ ბაჩალიაშვილი პროგრამისტი იყო და ბოლო თვეების განმავლობაში ონლაინ რეჟიმში მუშაობდა. პანდემიის მერე ოფისში არ დავდივართ. მე მოვდივარ ხოლმე, რომ შევამოწმო და ერთი-ორი ადამიანი შემოდის. ჩვენი განცხადება და რეესტრი გასაჯაროებულია, რატომ ვერ გვპოულობს ვიღაც, ვერ გავიგეთ. დასამალი არაფერი გვაქვს. პირადად ოჯახს ვუთხარი, რომ ახალ ამბებში დაერეკა, რათა იქნებ პროცესი დაჩქარებულიყო. მე მივწერე ნომერი, სად უნდა დაერეკათ“, - აცხადებს თამარ კობერიძე.

23 წლის თამარ ბაჩალიაშვილი თეთრიწყაროს ტყეში გარდაცვლილი იპოვეს. ხუთი დღის წინ დაკარგული 23 წლის გოგოს სამძებრო სამუშაოებში დღეს ვერტმფრენები და მყვინთავები ჩაერთვნენ. ამას წინ უძღოდა დაკარგული გოგოს ოჯახისა და ახლობლების საპროტესტო აქცია.

ოჯახის ადვოკატის, მიხეილ რამიშვილის განცხადებით, საქმეში დამოუკიდებელი ექსპერტიც ჩაერთვება.

თბილისში, ქვემო ფონიჭალაში მცხოვრები თამარ ბაჩალიაშვილი ვიდეოკამერებმა ბოლოს სოფელ ხაიშთან დააფიქსირეს. გოგო ნაცრისფერი ჰუნდაის მარკის მანქანით გადაადგილდებოდა.