ადვოკატი საქმის გადაკვალიფიცირებასა და თამარ ბაჩალიაშვილის​ უფლებამონაცვლედ მამის ცნობას ითხოვს

გარდაცვლილი თამარ ბაჩალიაშვილის ოჯახის ადვოკატი მიხეილ რამიშვილი რუსთავის პოლიციის განყოფილებაში იმყოფებოდა.

როგორც რამიშვილმა პოლიციიდან გამოსვლის შემდეგ განაცხადა, მისთვის საქმის მასალები არ გადაუციათ, რადგან დაზარალებულის უფლებამონაცვლედ ჯერ არავინ არის ცნობილი.

„ჯერჯერობით არაფერი გადმომცეს, რადგან ჯერ დაზარალებულის უფლებამონაცვლე არავინ არის. ასევე, 143-ე მუხლით არის აღძრული საქმე, თავისუფლების უკანონო აღკვეთა. მოვითხოვე, რომ უფლებამონაცვლედ ცნობილი იყოს მამამისი. ხვალ უნდა მოვითხოვო, გამაცნონ ​საქმის ყველა მასალა. სხვადასხვა დაკითხვა მიმდინარეობს და დაუყოვნებლივ მოვითხოვე, მამა გახდეს დაზარალებულის უფლებამონაცვლე, მოხდეს კვალიფიკაციის შეცვლა და ხვალ უნდა მოხდეს გადმოცემა. ძალიან ბევრი ადამიანის გამოკითხვა მიმდინარეობს, უშუალოდ არ ვიცი. ჩემთვის უკვე ძალიან საეჭვოა. მოგეხსენებათ, შაქარაშვილის ბიძას მეორე დღესვე ჰქონდა საშუალება, ჩართულიყო და შემხებლობა ჰქონოდა მაღალი თანამდებობის პირებთან და ვნახოთ, ხვალ რისი საშუალება გვექნება. ხვალ უნდა შეიკრიბოს ეს მასალა და ვნახავ, რა იქნება. თავისუფლების უკანონო აღკვეთაზე აღარ არის საუბარი, ადამიანი გარდაცვლილია და ვნახოთ, ყველაზე მცირე დანაშაულის კვალიფიკაცია თვითმკვლელობამდე მიყვანა მაინც უნდა იყოს“, - განაცხადა მიხეილ რამიშვილმა.

23 წლის თამარ ბაჩალიაშვილი თეთრიწყაროს ტყეში გარდაცვლილი იპოვეს. ოჯახის ადვოკატის, მიხეილ რამიშვილის განცხადებით, საქმეში დამოუკიდებელი ექსპერტიც ჩაერთვება.

თბილისში, ქვემო ფონიჭალაში მცხოვრები თამარ ბაჩალიაშვილი ვიდეოკამერებმა ბოლოს სოფელ ხაიშთან დააფიქსირეს. გოგო ნაცრისფერი ჰუნდაის მარკის მანქანით გადაადგილდებოდა.