ფოტოგრაფების საქმეზე დღეს მათი ყოფილი ადვოკატები იკითხებიან

თბილისის საქალაქო სასამართლოში ფოტოგრაფების საქმეზე მიმდინარე პროცესზე დღეს ის ადვოკატები დაიკითხებიან, რომლებიც 2011 წელს ჯაშუშობის ბრალდებით დაკავებულ ფოტორეპორტიორებს იცავდნენ. სხდომის დაწყებამდე ერთ-ერთმა მათგანმა ნინო ანდრიაშვილმა განაცხადა, რომ პროცესზე ისაუბრებს, თუ რა სახის ზეწოლა ხორციელდებოდა მისი დაცვის ქვეშ მყოფ პირებზე.

პროკურორის ინფორმაციით, მას შემდეგ რაც ფოტორეპორტიორებთან საპროცესო გარიგებაზე უნდა დაწყებულიყო საუბარი, პროკურატურამ მოითხოვა ეს ადვოკატები საქმეს ჩამოსცილებოდნენ და ბრალდებულების დაცვა განეხორციელებინათ ადვოკატ ყავლაშვილის ბიუროს ადვოკატებს.

ფოტოგრაფების საქმეზე, კონტრდაზვერვის ყოფილი მაღალჩინოსანი დავით დევნოზაშვილი, უფლებამოსილების გადამეტების ბრალდებით დააკავეს. საქმეზე ასევე ბრალდებულია ალექსანდრე მუხაძე, რომელიც იძებნება.

ფოტოგრაფების საქმეზე მიმდინარე პროცესზე 2 ივნისის პროცესზე გლდანის ნომერ მერვე სასჯელაღსრულების ყოფილი და მოქმედი თანამშრომლები დაკითხეს. 

ფოტოგრაფების საქმეზე უკვე დაკითხეს გიორგი აბდალაძე, ზურაბ ქურციკიძე, ირაკლი და ნათია გედენიძეები. შინაგან საქმეთა სამინისტროს კონტრდაზვერვის დეპარტამენტმა 2011 წლის 7 ივლისს ფოტოგრაფები დააკავა, მათ  ჯაშუშობაში ადანაშაულებდნენ. დაკავებული იყვნენ ევროპის პრესფოტოს სააგენტოს ფოტოგრაფი ზურაბ ქურციკიძე, ყოფილი პრეზიდენტის პირადი ფოტოგრაფი ირაკლი გედენიძე, მისი მეუღლე, “პრაიმ ტაიმის” ფოტორეპორტიორი ნათია გედენიძე და საგარეო საქმეთა სამინისტროს პრესამსახურის ფოტოგრაფი გია აბდალაძე.  

პროკურატურამ ე.წ ფოტოგრაფების საქმე 2016 წელს გახსნა. უწყების განცხადებით ფოტოგრაფები: გიორგი აბდალაძე, ზურაბ ქურციკიძე და ირაკლი გედენიძე ჯაშუშობის გამოგონილი ბრალდებით დააკავეს და მათ ხელისუფლება 26 მაისის აქციის დაშლის აქტიური გაშუქების გამო გაუსწორდა.