ნინო წილოსანი რურუას საქმეზე: დამოუკიდებელი სასამართლოს გადაწყვეტილებაში ეჭვის შეტანა მიუღებელია

გიორგი რურუა, ჩემთვის არც პოლიტიკურ პერსონალს წარმოადგენს და მათ შორის არც მედიასთან დაკავშირებულ პირს, რადგან ვიცით მისი დამოკიდებულება და მისი ჩართვის ხარისხი მედიაში, - ამის შესახებ უმრავლესობის დეპუტატმა, ნინო წილოსანმა განაცხადა.

მისი თქმით, დამოუკიდებელი სასამართლოს გადაწყვეტილებაში ეჭვის შეტანა მიუღებელია.

„რაც შეეხება მის პრეზიდენტის მხრიდან შეწყალებას ან პროცესს, რომელიც სასამართლოში წარიმართა, ერთი მხრივ, სასამართლო, რომელიც მნიშვნელოვან პროგრესს განიცდის ამ წლების განმავლობაში, მათ შორის ამერიკის შეერთებული შტატების ხელისუფლების დახმარებით. ჩემთვის მიუღებელია ეჭვი შევიტანო ამ დამოუკიდებელი შტოს გადაწყვეტილებაში და მეორე მხრივ, ასევე ხელისუფლების დამოუკიდებელი შტოს პრეზიდენტის ნება და დისკრეციული უფლებაა შეიწყალებს თუ არა ის კონკრეტულ პატიმარს. ჩემთვის, როგორც ხელისუფლების წარმომადგენლისთვის, მნიშვნელოვანია რომ ყველა ადამიანი, არ აქვს მნიშვნელობა მის პოზიციას, იყოს კანონის წინაშე პასუხისმგებელი“, - განაცხადა ნინო წილოსანმა.

20 ოპოზიციური პოლიტიკური პარტია გიორგი რურუასადმი გამამტყუნებელი განაჩენის გამოტანასთან დაკავშირებით ერთობლივ განცხადებას ავრცელებს. განცხადების ავტორების თქმით, გიორგი რურუას გათავისუფლება და პოლიტიკურად მოტივირებული საქმეების დაუშვებლობა, 8 მარტის შეთანხმების საკვანძო ნაწილია.

სასმართლომ გიორგი რურუას 4-წლიანი პატიმრობა მიუსაჯა და იარაღის შეძენა-შენახვა-ტარების ნაწილში დამნაშავედ ცნო. რურუას ადვოკატები საქმის გასაჩივრებას აპირებენ.

გიორგი რურუა 2019 წლის 18 ნოემბერს დააკავეს. გამოძიება მას სსკ-ის 236-ე მუხლის მესამე და მეოთხე ნაწილებით გათვალისწინებულ დანაშაულს ედავება, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.