გიორგი მიქაუტაძე: შემოთავაზებულია კანდიდატებთან გასაუბრების ახალი მოდელი, რომელიც გარკვეულ დაბრკოლებებს ქმნის

პროცედურულად შემოთავაზებულია კანდიდატებთან გასაუბრების ახალი მოდელი, რაც ჩვენი აზრით, გარკვეულ დაბრკოლებებს ქმნის და საჭიროებს დამატებით რეგულაციებს, - ამის შესახებ იუსტიციის უმაღლესი საბჭოს მდივანმა, გიორგი მიქაუტაძემ დიპლომატიური კორპუსის, იუსტიციის უმაღლესი საბჭოსა და არასამთავრობო ორგანიზაციების წარმომადგენლების მონაწილეობით პარლამენტში გამართული შეხვედრის შემდეგ განაცხადა.

„ჩვენი, ისევე როგორც ამ სამუშაო ჯგუფის ყველა წევრისა და საერთაშორისო პარტნიორის მიზანი ამ პროცესში არის ის, რომ ამ პროცედურის მაქსიმალური შესაბამისობა მოხდეს იმ რეკომენდაციებთან, რომელიც აქვს ვენეციის კომისიასა და საერთაშორისო პარტნიორებს. განხილვა ეხება სამ ძირითად საკითხს და ეს არის: იუსტიციის უმაღლესი საბჭოს მიერ გადაწყვეტილების დასაბუთება, ამ დასაბუთების გასაჩივრება და აქედან გამომდინარე საკითხად იდგა კენჭისყრის ღიაობა-ფარულობა. ვფიქრობ, რომ პოზიციები ამ ეტაპისთვის დაახლოებულია. თუმცა, კვლავ რჩება გარკვეული საკითხები და დეტალები, რომელიც გადაწყვეტას საჭიროებს. პროცედურულად შემოთავაზებულია ახალი მოდელი კანდიდატებთან გასაუბრებისთვის, რაც ჩვენი აზრით, გარკვეულ დაბრკოლებებს ქმნის და საჭიროებს დამატებით რეგულაციებს. ასევე შემოთავაზებული იყო ფარულობისა და ღიაობის ნაწილში შუალედური ვარიანტი, რომელიც ჩემი აზრით, ასევე დახვეწას საჭიროებს“, - განაცხადა მიქაუტაძემ.

მისივე თქმით, პროექტი ეხება იმ სამ ძირითად საკითხს, რომელიც ვენეციის კომისიას ჰქონდა დაყენებული, ამიტომ მიუღებელია ამ ფორმით კრიტიკა, რომ ცვლილებები ვენეციის კომისიის რეკომენდაციებს არ შეესაბამება.

„ცოტა ისტორიულად რომ აღგიწეროთ პროცესი, რასთან გვაქვს შეხება - მესამე ტალღის ფარგლებში მივიღეთ თვისობრივად ახალი კანონმდებლობა. ჩვენი ქვეყნის ისტორიაში პირველად მივიღეთ უპრეცედენტო შერჩევის პროცესი, გამჭვირვალე პროცესი, რომელსაც ყველა ადევნებდით თვალს. ბუნებრივია, ვინაიდან პროცესი პირველად ჩატარდა, ყველამ აღიარა, რომ ეს იყო იმაზე ბევრად უკეთესი და გაუმჯობესებულო ვარიანტი, ვიდრე ერთი პოლიტიკური ხელისუფლის მიერ წარდგენილი და დანიშნული მოსამართლეები. ბუნებრივია, ამასთან შედარება არ არის და პროცესი არის გაუმჯობესებული, თუმცა მიმდინარეობის პროცესში კვლავ იყო კრიტიკა, თუნდაც დასაბუთების და გასაჩივრების მექანიზმებზე, სწორედ ამ რეკომენდაციებთან შესაბამისობაში მოყვანის და კანონმდებლობის შემდგომი დახვეწის მიზნით არის შეკრებილი დღეს ეს სამუშაო ჯგუფი და ეს კანონპროექტი სწორედ ამ მიზნებს ემსახურება“, - განაცხადა მიქაუტაძემ.

საერთო სასამართლოების შესახებ კანონში ცვლილებებს პლენარულ სხდომაზე პარლამენტი ხვალ განიხილავს.