ირაკლი კობახიძე „საერთო სასამართლოების შესახებ კანონპროექტზე“: ვფიქრობ, მთლიანადაა შესრულებული ის რეკომენდაციები, რომელიც ვენეციის კომისიამ წარმოადგინა

ჩვენ ვფიქრობთ, რომ მთლიანად არის შესრულებული ის რეკომენდაციები, რომელიც ვენეციის კომისიამ წარმოადგინა, - ამის შესახებ „ქართული ოცნების“ აღმასრულებელმა მდივანმა, ირაკლი კობახიძემ გადაცემა „არენაში“ „საერთო სასამართლოების შესახებ კანონპროექტზე“ საუბრისას განაცხადა.

მისივე თქმით, ვენეციის კომისიას კანონპროექტის მიმართ სამი რეკომენდაცია ჰქონდა.

„არცერთი ნორმა ამ კანონში არ იყო ისეთი, რომ სამართლებრივად გაუმართავი ყოფილიყო. ეს მათ შორის, საკონსტიტუციო სასამართლომ დაადასტურა. საკონსტიტუციო სასამართლოში იყო გასაცივრებული ეს კანონი, თუმცა სასამართლომ დაადგინა, რომ აქამდე მოქმედი კანონი მთლიანად შეესაბამებოდა კონსტიტუციას. რაც შეეხება თავად ჩვენს ამოცანას, კიდევ ერთხელ უნდა გადაგვეხედა ამ პროცედურისთვის. ვენეციის კომისიის რეკომენდაციების მიხედვით სამი ზირითადი რეკომენდაცია იყო.

პირველი ეხებოდა დასაბუთებას. აქ დაზუსტდა მთელი რიგი რეგულაციები, რომელიც უკავშირდებოდა გადაწყვეტილების დასაბუთებას. ანუ, კანდიდატები ქულებით ფასდებიან, ამის შემდეგ თითოეული საბჭოს წევრის მიერ დასაბუთება უნდა შედგეს და ასე შემდეგ. ეს კანონპროექტში სათანადოდაა ასახული. ჩვენ უკვე კანონპროექტი ორი მოსმენით მივიღეთ.

მეორე რეკომენდაცია ეხებოდა გასაჩივრების წესს. გასაჩივრებასთან დაკავშირებითაც ჩვენ გვაქვს მკაფიო რეგულაციები. ახალი კანონპროექტით, ეს გადაწყვეტილება გასაჩივრებას ექვემდებარება უზენაეს სასამართლოში. ამასთა, კანონპროექტში წერია, რომ გასაჩივრება აჩერებს გადაწყვეტილების აღსრულებას.

ასევე, გამჭვირვალობის, ღიაობის ნაწილში ჩვენ მივიღთ გადაწყვეტილება, რომ იუსტიციის უმაღლესი საბჭოს შიგნით კენჭისყრა ღიაა, რაც იმას ნიშნავს, რომ როდესაც გადაწყვეტილება მიიღება, თუ ვინ ვის მისცა ხმა, ვინ როგორ შეაფასა და ასე შემდეგ, ცნობილი ხდება საბჭოს თითოეული წევრისთვის და მეტიც, მოგვიანებით, თუ რომელიმე კანდიდატს სურს ამ გადაწყვეტილების გასაჩივრება, სრული ინფორმაცია, მათ შორის, სახელებისა და გვარების მითითებით, მიეწოდება გამსაჩივრებელ პირს. ანუ, ღიაობის პრინციპიც ამ კანონპროექტში სრულადაა ასახული.

იყო სამი რეკომენდაცია, შესაბამისად, ჩვენ მოვამზადეთ კანონპროექტი ამ რეკომენდაციების მიხედვით, გვქონდა მჭიდრო კონსულტაციები თითოეულ ნორმასთან დაკავშირებით მთელი ამ დღეების განმავლობაში ჩვენს საერთაშორისო პარტნიორებთან. შესაბამისად, ჩვენ ვფიქრობთ, რომ მთლიანად არის შესრულებული ის რეკომენდაციები, რომელიც ვენეციის კომისიამ წარმოადგინა“, - განაცხადა ირაკლი კობახიძემ.

პარლამენტმა საერთო სასამართლოების შესახებ კანონში ცვლილებები მეორე მოსმენით დაამტკიცა.

რა ცვლილებებს გულისხმობს საერთო სასამართლოების შესახებ კანონპროექტი, ნახეთ ამ ბმულზე.