ირაკლი სესიაშვილი ზუგდიდში განვითარებულ მოვლენებზე: შსს-მ იმაზე მეტი იცის, ვიდრე ზოგიერთ ტელევიზიას ფანტაზიაში მოუვა

მედია ინტერესდება, რომ მოხდეს პირის იდენტიფიცირება და ხომ არ ჰყავს ამ პირს თანამზრახველი. ზოგიერთმა პოლიტიკურმა მედიამ უკვე პარალელური გამოძიება დაიწყო. ეს არის მათი პოლიტიკური არჩევანი და სტრატეგია, რომ ამ ტრაგედიებით საკუთარი პოლიტიკური ინტერესები გაიმყარონ, - ამის შესახებ პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა იმედის გადაცემა „პოზიციაში“ ზუგდიდში „საქართველოს ბანკზე“ განხორციელებულ თავდასხმაზე საუბრისას განაცხადა.

„ყოველგვარი პოლიტიკური ნიშნის გარეშე საზოგადოებაში არის ინტერესი, რომ იცოდნენ პოლიციამ იცის თუ არა ვინ იყო ეს თავდამსხმელი, საზოგადოებას აინტერესებს დევნის ოპერაცია მიმდინარეობს თუ არა და აქვთ შიში - ხვალ იგივე ხომ არ განმეორდება?! მინდა საზოგადოებას ვუთხრა: ჩვენ გვაქვს საქმე პირთან, რომელიც მზად იყო საკუთარი სიცოცხლეც მოესპო და მძევლებიც მოეკლა იმ მიზნისთვის, რაც მან დაგეგმა. დაგეგმილი აქვს ყველაფერი, წამსვლელია სიკვდილზე. მისი მიზანია, (რომელიც მისი მოქმედებებიდან ჩანს), ბიოლოგიური მასალაც არ დატოვოს. მას აქვს მიზანი და განცდა, რომ ის ფულს ისე წაიღებს, რომ მისი იდენტიფიცირება ვერ მოხდეს. მას გამიზნული აქვს, რომ მისი იდენტიფიცირება არ მოხდეს და არის თავზეხელაღებული. როგორც კი მისი იდენტიფიცირება საჯაროდ მოხდება, ეს იმას ნიშნავს, რომ პირი მიხვდება, რომ ის კუთხეშია მოქცეული და რამდენადაც მისი ქმედებები იყო მაღალი ხიფათის მატარებელი, ის შეიძლება თავზეხელაღებული გახდეს და სხვა დანაშაულზე წავიდეს. ამიტომ მე, მედიას და საზოგადოებას მივმართავ, ვუხსნი, რომ ამ ინფორმაციებზე შინაგან საქმეთა სამინისტრო მუშაობს და ამ სტრუქტურამ იმაზე მეტი იცის, ვიდრე ზოგიერთ ტელევიზიას რა ფანტაზიაც მოუვა, ყველა მიმართულებით უკვე მუშაობენ და დარწმუნებული ვარა, ძალიან მალე კვალზე გავლენ, მაგრამ ეს უნდა განხორციელდეს ისე, რომ მეორე რისკი არ წარმოიქმნას“, - აღნიშნა ირაკლი სესიაშვილმა.

ზუგდიდის ცენტრში, გამსახურდიას ქუჩაზე მდებარე „საქართველოს ბანკში“ შეიარაღებულმა პირმა მძევლები 21 ოქტომბერს აიყვანა.

თავდამსხმელი შენობიდან 3 მძევალთან ერთად გამოვიდა. როგორც კადრებში გამოჩნდა, მას შენობის დატოვების დროს ერთი ხელი აწეული ჰქონდა და სავარაუდოდ ხელში ხელყუმბარა ეკავა.

22 ოქტომბერს, გამთენიისას შსს-მ გაავრცელა განცხადება, რომლის თანახმად, ავთანდილ გალდავას უშუალო ძალისხმევით შეიარაღებული დამნაშავისგან ყველა მძევალი გათავისუფლდა და მათ სიცოცხლეს და ჯანმრთელობას საფრთხე არ ემუქრება. ხოლო დამნაშავის დაკავების მიზნით სამართალდამცველები ინტენსიურ რეჟიმში აგრძელებენ ოპერატიულ-საგამოძიებო და სამძებრო ღონისძიებებს.