პროკურორი: ერთადერთი ადგილი, სადაც მელაშვილი და ილიჩოვა დაბრუნდებიან, ეს იქნება სასჯელაღსრულების დაწესებულება

მართალია, ივერი მელაშვილი წუხდა, რომ ვერ ბრუნდებოდა სამსახურში, მაგრამ ერთადერთი ადგილი სადაც ივერი მელაშვილი და ნატალია ილიჩოვა დაბრუნდებიან, ეს იქნება სასჯელაღსრულების დაწესებულება, - ამის შესახებ ტელეკომპანია „იმედის“ გადაცემაში „იმედის ფაქტორი“ დავით გარეჯის საქმის პროკურორმა, მიხეილ სადრაძემ განაცხადა.

„გუშინ ცალსახად ვიხილეთ ბრალდებულის დეკლარირებული პოზიცია, რომ დავით გარეჯი არაა საქართველოს ტერიტორია. ეს არის სამწუხარო ფაქტი. თუმცა, გარდა ამ აღიარებისა, საქმეში არსებობს უამრავი დოკუმენტი და მტკიცებულება, რაც მათ ბრალეულობას ადასტურებს. ეს არის მათ მიერ ხელმოწერილი დოკუმენტები, ასევე ექსპერტიზის დასკვნები, რუკები და სხვა დოკუმენტაცია. დიახ, მათ შეეცვალათ პატიმრობა გირაოთი, მაგრამ ეს არ ნიშნავს პროკურატურის პოზიციის შერბილებას. პირიქით, მათ მიერ ჩადენილი ქმედებები იმდენად მაღალი მტკიცებულებითი სტანდარტითაა დადასტურებული, რომ ჩვენ ამ ეტაპზე აღარ მივიჩნიეთ საჭიროდ პატიმრობის გამოყენება. ამავდროულად, ისინი ჩამოშორდნენ თანამდებობებს, ივერი მელაშვილი გათავისუფლდა თავისი თანამდებობიდან. მართალია, ის წუხდა, რომ ვერ ბრუნდებოდა სამსახურში, მაგრამ ერთადერთი ადგილი სადაც ივერი მელაშვილი და ნატალია ილიჩოვა დაბრუნდებიან, ეს იქნება სასჯელაღსრულების დაწესებულება - ეს მოხდება მტკიცებულებების საფუძველზე და სამართლიანი სასამართლოს პირობებში“, - განაცხადა პროკურორმა.