პროკურორი: ნიკანორ მელიას საქმეში ყველა მტკიცებულება სახეზეა

ნიკანორ მელიას დაპატიმრება რომ პროკურატურის თვითმიზანი ყოფილიყო, ფორმალურად 24 დეკემბრის შემდეგ მის მიერ კანონი არის დარღვეული, - ამის შესახებ ტელეკომპანია „იმედის“ ეთერში, გადაცემა „დღის ქრონიკაში“ პროკურორმა ამირან გულუაშვილმა განაცხადა.

„ჩვენ ვთვლიდით და დღესაც მიგვაჩნია, რომ მხოლოდ ფორმალური მოთხოვნის შეუსრულებლობა არ არის საკმარისი აღკვეთის ღონიძიების შესაცვლელად, აუცილებელია კონკრეტული გარემოებების არსებობა, თუნდაც, ის, რომ მისი მატერიალური მდგომარეობიდან გამომდინარე მან უზრუნველყოს გირაოს გადახდა“, - აღნიშნა გულუაშვილმა.

ამასთან პროკურატურის განცხადებაში, ნათქვამია, რომ 2020 წლის დეკემბერში შევსებული დეკლარაციის თანახმად, ნიკანორ მელიას ჰქონდა სრული შესაძლებლობა ანგარიზე განეთავსებინა მთელი თანხა. „მელიამ ობიექტური მიზეზების მიუხედავად არ უზრუნველყო გირაოს თანხის გადახდა“, - აღნიშნა გულუაშვილმა.

მისი თქმით, არაერთ ინსტანციაში იყო შეფასებული ის მტკიცებულებითი სტანდარტი რაც ამ საქმეში არის. „ნებისმიერი აღკვეთის ღონისძიების გამოცხადებას, წინ უძღვის მოსამართლის შეფასება და არსებობს დასაბუთებული ვარაუდის სტანდარტი მოცემულ საქმეზე. თბილისის საქალაქო სასამართლომ და შემდგომში სააპელაციომ აღკვეთის ღონისძიებების გამოყენებისას ხაზი გაუსვეს ამ გარემოებებში საკუთარ გადაწყვეტილებებს და აღნიშნეს, რომ ნიკანორ მელიას მიმართ არსებობს საკმარისი მტკიცებულებები, რომ მან შესაძლოა ჩაიდინა ეს დანაშაულებრივი ქმედება. დღეის მდგომარეობით საქმე განიხილება არსებითად, რაც იმას ნიშნავს რომ წინასასამართლო ეტაპი გაიარა ამ სისხლის სამართლის საქმემ და სასამართლომ დაადგინა ალბათობის მაღალი ხარისხით გამამტყუნებელი განაჩენის დადგომის შესაძლებლობა, რაც ნიშნავს, რომ ყველა მტკიცებულებითი სტანდარტი მოცემულია ამ საქმეში. რაც შეეხება სისხლის სამართლის საქმეს, ყველა საკანონმდებლო სტანდარტით ყველა მტკიცებულება სახეზეა“, - განაცხადა გულუაშვილმა.

„პოლიტიკურად მოტივირებული საქმის გირაოს გადახდას არ ვაპირებ“, - ამის შესახებ „ნაციონალური მოძრაობის“ თავმჯდომარემ, ნიკა მელიამ პარტიის ოფისში გამართულ ბრიფინგზე განაცხადა

ნაციონალური მოძრაობის“ თავმჯდომარეს, ნიკა მელიას გირაოს დარჩენილი თანხის გადახდის ვადა დღეს ეწურება. პროკურატურამ პარლამენტს ნიკა მელიას დასაპატიმრებლად შუამდგომლობაზე თანხმობა სთხოვა.