გოჩა ლორთქიფანიძე: სახელმწიფო მმართველობისა და ინსტიტუტების გაძლიერებისათვის იუსტიციის სამინისტრო სერვისების ხელმისაწვდომობის გაზრდასა და პენიტენციური სისტემის რეფორმის გაგრძელებას გეგმავს

იუსტიციის მინისტრობის კანდიდატი საქართველოს პარლამენტის ოთხი კომიტეტის გაერთიანებულ სხდომაზე სიტყვით გამოვიდა. გოჩა ლორთქიფანიძემ იუსტიციის სამინისტროს პრიორიტეტებზე ისაუბრა, მათ შორის, სახელმწიფო მმართველობის გაძლიერებისა და ინსტიტუციური დემოკრატიის განმტკიცების მიმართულებებით.

„ადამიანის უფლებებზე დაფუძნებული მიდგომის ფარგლებში, მნიშვნელოვანია, გაგრძელდეს იუსტიციის სახლებისა და საზოგადოებრივი ცენტრების მშენებლობა, რათა სახელმწიფო სერვისები მაქსიმალურად ხელმისაწვდომი იყოს ჩვენი მოქალაქეებისთვის, განსაკუთრებით კი, რეგიონში მცხოვრები პირებისთვის. გაიზრდება იმ სერვისების რიცხვი, რომელთა მიღებას იუსტიციის სახლებსა და საზოგადოებრივ ცენტრებშია შესაძლებელი; პრიორიტეტული გახდება ელექტრონული სერვისების მიმართულება.

„ჩვენ ზოგად ადმინისტრაციულ კოდექსში ცვლილებებსაც წარმოგიდგენთ, რათა კიდევ უფრო მეტად მოიხსნას სახელმწიფო უწყებებთან კომუნიკაციის დროს არსებული ბარიერები და შეიქმნას ყველა სერვისის ერთიანად მიღებისთვის აუცილებელი სამართლებრივი ჩარჩო“, - განაცხადა ლორთქიფანიძემ.

იუსტიციის მინისტრობის კანდიდატმა​ პენიტენციური სისტემის რეფორმაზეც ისაუბრა. მისი თქმით, ადამიანის უფლებების ორიენტირებული მიდგომა კვლავ რჩება ძირითად პრინციპად.

რაც შეეხება ინფრასტრუქტურულ პროექტებს, გოჩა ლორთქიფანიძის თქმით, „პრიორიტეტი იქნება ახალი მცირე ზომის (600-700 მსჯავრდებულზე გათვლილი) დახურული ტიპის, თანამედროვე ევროპული სტანდარტების შესაბამისი პენიტენციური დაწესებულების მშენებლობა, რომლებიც რესოციალიზაცია-რეაბილიტაციის მიზნის მიღწევის შესაბამის პირობებს შექმნის და რომელთა საპროექტო სამუშაოები დასრულების ეტაპზეა; შეიქმნება საოჯახო ტიპის პენიტენციური დაწესებულებები, სადაც ერთი და იმავე სასწავლო ინტერესებისა და მისწრაფებების მქონე რამდენიმე არასრულწლოვანი თავსდება და ოჯახურ გარემოში ცხოვრობს გათავისუფლებამდე“.

იუსტიციის მინისტრობის კანდიდატის განცხადებით, პატიმართა რესოციალიზაციის მიზნით გაფართოვდება მათთვის შეთავაზებული დასაქმების პროგრამები, გაძლიერდება საგანმანათლებლო კომპონენტიც.