კორტების სპეცოპერაციის საქმეში სპეცრაზმელების ბრალი გადაკვალიფიცირდა

კორტების სპეცოპერაციაში მონაწილე სპეცრაზმელებს განზრახ მკვლელობის მუხლი უფლებამოსილების გადამეტების მუხლით შეეცვალათ. ბრალის ახალი ფორმულირება და მუხლის გადაკვალიფიცირება პროკურორმა ვლადიმერ ვექილიანმა მოითხოვა. მისი განმარტებით, სპეცრაზმელების მიმდინარე სასამართლო პროცესმა, ასევე კოსტების საქმეზე ირაკლი ფირცხალავას და გიორგი ცააძის განაჩენმა დაადასტურა, რომ სპეცრაზმელების ქმედების ზუსტი კვალიფიკაცია არ ყოფილა განზრახ მკვლელობა.

მკვლელობის ორგანიზებისთვის და მკვლელობისთვის ფირცხალავას და ცააძეს 12 წელი მიესაჯათ, რაც სააპელაციო სასამართლომ ძალაში დატოვა. პროკურორის შუამდგომლობა მოსამართლე გიორგი არევაძემ დააკმაყოფილა და პროცესი უფლებამოსილების გადამეტების მუხლით გაგრძელდება. მოსამართლემ მანამდე ბრალდების კიდევ ერთი მოთხოვნა დააკმაყოფილა. სპეცრაზმელების საქმეს ახალი მტკიცებულება- ფირცხალავას და ცააძის საქმეზე სააპელაციო სასამართლოს განაჩენი ახალ მტკიცებულებად დაურთო.

21 ივნისს, სააპელაციო სასამართლომ ძალაში დატოვა გამამტყუნებელი განაჩენი რომლითაც მკვლელობის ორგანიზების ბრალდებით, ორაკლი ფირცხალავას 12, ხოლო მკვლელობის ბრალდებით, გიორგი ცააძეს 12 წლიანი პატიმრობა მიესაჯა.

გიორგი ცააძესა და ირაკლი ფირცხალავას 2006 წლის მაისში კორტების მიმდებარედ, ზურაბ ვაზაგაშვილის და ალექსანდრე ხუბულოვის მკვლელობას და მკვლელობის ორგანიზებას ედავებიან.