ამირან გულუაშვილი: ადვოკატებისა და თავად ნიკანორ მელიას მიზანია, რაც შეიძლება დიდხანს გაგრძელდეს პატიმრობა

ნიკანორ მელიას პატიმრობა არასდროს ყოფილა პროკურატურის თვითმიზანი, - ამის შესახებ პროკურორმა ამირან გულუაშვილმა განაცხადა.

მისი თქმით, პროკურატურამ 25 თებერვალს აღკვეთის ღონისძიების შეცვლის წინადადება დააყენა, რითაც დაცვის მხარეს შესთავაზა, რომ ნიკანორ მელიას მიმართ გამოყენებული პატიმრობა შეცვლილიყო გირაოთი იმ შემთხვევაში, თუ დაცვის მხარეს ამის სურვილი ჰქონდა.

„მოცემული საქმის განხილვის ეტაპზე ბრალდების მხარის მიერ იქნება წარმოდგენილი ყველა უტყუარი მტკიცებულება, რაც ცალსახად დაადასტურებს ნიკანორ მელიას მიერ ბრალად შერაცხული ქმედების ჩადენას. საქმის არსებითი განხილვის ეტაპზე მოხდება მოწმეთა დაკითხვა, გამოკვლეული იქნება ვიდეო ჩანაწერები, რომლებიც ძალიან ნათლად ასახავს ნიკანორ მელიას დანაშაულებრივ ქმედებებს 2019 წლის 20 ივნისს განვითარებული მოვლენებისას. გამოკვლეული იქნება ყველა ის მტკიცებულება, რაც სასამართლოს ნათლად დაარწმუნებს მის ბრალეულობაში. საქმეში მოიპოვება არაერთი მოწმის ჩვენება, ვიდეოჩანაწერი, რომელიც ადასტურებს ნიკანორ მელიას მხრიდან იმ ძალადობრივ ქმედებებში მონაწილეობას და ამ ქმედებების ორგანიზებაც, რომელიც საბოლოო ჯამში, განხორციელდა პარლამენტის სასახლის მიმდებარე ტერიტორიაზე“, - განაცხადა ამირან გულუაშვილმა.

პროკურორის თქმით, ​პატიმრობაში დარჩენა ნიკანორ მელიას თვითმიზანია.

„ნიკანორ მელიას პატიმრობა არასდროს ყოფილა პროკურატურის თვითმიზანი. პროკურატურამ საჯარო განცხადებით დაცვის მხარეს შესთავაზა კონკრეტული სამართლებრივი გზა მათი მზადყოფნის შემთხვევაში, როგორ უნდა მომხდარიყო აღკვეთის ღონისძიების შეცვლა, რეალურად, ნიკანორ მელიასა და მისი ადვოკატების მიზანი არის, რაც შეიძლება დიდხანს გაგრძელდეს ნიკანორ მელიას პატიმრობაში ყოფნა. ნიკანორ მელიას პატიმრობა არის ნიკანორ მელიას თვითმიზანი“, - განაცხადა ამირან გულუაშვილმა.

„ნაციონალური მოძრაობის“ თავმჯდომარის საქმის არსებითი განხილვა დღეს, 11:00 საათზე დაიწყო.

სასამართლოს 2020 წლის 3 ნოემბრის განჩინებით, ნიკა მელიასთვის აღკვეთის ღონისძიების სახით შეფარდებული გირაოს თანხა 40 000 ლარით გაიზარდა. გადახდის ვადად მელიას 50 დღე განესაზღვრა, თუმცა მან გირაო არ გადაიხადა, რის შემდეგაც პროკურატურის შუამდგომლობის საფუძველზე 23 თებერვალს დააკავეს.