ოთარ აბესაძემ ოჯახს და საზოგადოებას ბოდიში მოუხადა

„დუმილის უფლებას, რომელსაც ვიყენებ, არ ნიშნავს, რომ არ ვითანამშრომლებ გამოძიებასთან“, - განაცხადა დღევანდელ პროცესზე ბრალდებულმა ოთარ აბესაძემ.

მან ასევე, საზოგადოებას და ოჯახს მიმართა. „მინდა ჩემი ოჯახის წევრებს, მეგობრებს და საზოგადოებას ამ უხერხულობის გამო, რაც შევქმენი, დიდი სინანულით ბოდიში მოვუხადო. ამ ყველაფერზე სინანულის გრძნობით ვსაუბრობ“,- განაცხადა აბესაძემ. 

ოთარ აბესაძეს ბრალი სახელმწიფო უსაფრთხოების სამსახურში გუშინ წაუყენეს. სახელმწიფო უსაფრთხოების სამსახურის ანტიკორუფციულმა სააგენტომ ქრთამის აღების ფაქტზე თბილისის მერიის თანამშრომელი ოთარ აბესაძე 12 ივლისს დააკავა. 

გამოძიებამ დაადგინა, რომ ოთარ აბესაძე მოქალაქეებს მდინარე მტკვარზე, ტივზე კაფეს მოწყობის ნებართვების დაჩქარებული წესით აღებას დაჰპირდა, რის სანაცვლოდ ქრთამი, 3 000 აშშ დოლარი მოითხოვა. მან მოქალაქეებს განუმარტა, რომ არქიტექტურის, ქონების და ზედამხედველობის სამსახურებში ყველა საკითხი შეთანხმებული იყო, სამუშაოების დაწყება შეეძლოთ და ჯარიმებიც არ იქნებოდა.