ქურდული სამყაროს წევრობისთვის დაკავებულები პატიმრობას არ ასაჩივრებენ

ქურდული სამყაროს წევრობის ბრალდებით დაკავებული დავით და ტარიელ მახარობლიძეების ადვოკატი ტარიელ კაკაბაძე ბრალდებულებისთვის აღკვეთის ღონისძიებად პატიმრობის შეფარდების საკითხს სააპელაციო სასამართლოში აღარ გაასაჩივრებს. ინფორმაციას 1tv ადვოკატზე დაყრდნობით ავრცელებს. 

“იმისათვის, რომ შეიცვალოს აღკკვეთის ღონისძიება, აუცილებელია არსებობდეს ახალი გარემოებები. დაცვის მხარეს ნამდვილად გვაქვს ახალი მტკიცებულებები, რომლებიც საკმაოდ დიდი მნიშვნელობის მქონე მტკიცებულებებია, თუმცა ჩვენი - დაცვის მხარის სტრატეგიიდან გამომდინარე, უმჯობესია, აღნიშნული მტკიცებულებები სასამართლოს წარვუდგინოთ. წინასასამართლო ეტაპზე ჩვენი ყველა მტკიცებულება დასაშვებად იქნება ცნობილი. ჩვენ ასევე დავაყენებთ შუამდგომლობას, მოვითხოვთ აღკვეთის ღონისძიების შეცვლას და რა თქმა უნდა, როდესაც გადავალთ არსებით განხილვაზე, კონკრეტულად დავიწყებთ მტკიცებულებების გამოკვლევას და მოწმეების დაკითხვას, სასამართლო დარწმუნდება, რომ ორივე ბრალდებული - დავით და ტარიელ მახარობლიძე - აბსოლუტურად უდანაშაულოა, მათ მიმართ აუცილებლად დადგება გამამართლებელი განაჩენი“ - განაცხადა ტარიელ კაკაბაძემ.

შსს-ს თანამშრომლებმა სამი ადამიანი 31 ივლისს დააკავეს. სპეცოპერაცია ერთდროულად ორ ქალაქში, თბილისსა და რუსთავში ჩატარდა. გამოძიების ცნობით, ბრალდებულებს უცხოეთში მყოფ, ეგრეთ წოდებული ქურდული სამყაროს წევრებთან ჰქონდათ კავშირი და მათი დავალებით რუსთავში მცხოვრებ ერთ-ერთ მოქალაქეს თანხა გამოსძალეს.

ბრალდებულებს აღკვეთის ღონისძიების სახით სასამართლომ პატიმრობა გუშინ შეუფარდა. საქმეზე წინასასამართლო სხდომა 21 სექტემბერს ჩაინიშნა.