აუდიტორები „ქართული ოცნების“, „ევროპული საქართველოს“ და „გირჩის“ შემომწირველებს შეამოწმებენ

გენერალური აუდიტორის მოვალეობის შემსრულებლის, ნინო ლომჯარიას განცხადებით, სახელმწიფო აუდიტის სამსახური შეისწავლის თითქმის ყველა შემოწირულობას, რომელიც შეადგენს რამდენიმე ათას ლარს.

„რომელი შემოწირულობაც აჭარბებს რამდენიმე ათას ლარს, დავიწყეთ გადამოწმება, თუ რამდენად ჰქონდა შემომწირველს შესაბამისი მატერიალური რესურსი და ფინანსური ბრუნვა“, - განაცხადა ლომჯარიამ.

მისი თქმით დარღვევის გამოვლენის შემთხვევაში გათვალისწინებულია ჯარიმა. დადგენილი ლიმიტის გადაჭარბება ჯერ არ ფიქსირდება. ნინო ლომჯარია ამბობს, რომ აუდიტის სამსახური შეამოწმებს ასევე, ხომ არ ჰქონდა ადგილი უცხოეთიდან დაფინანსებას.

საქართველოს კანონმდებლობა კრძალავს უცხო ქვეყნის მოქალაქის მიერ შემოწირულობის განხორციელებას. 

დღეს აუდიტის სამსახურმა პარტიების შემოწირულობების შესახებ განცხადება გააკეთა. ლომჯარია ამბობს, რომ შემოწირულობები მიმდინარე წლის ივლისის თვიდან გააქტიურდა.

ყველაზე მეტი შემოწირულობა, დაახლოებით 1 270 000 ლარი „ქართულ ოცნებას“ აქვს. 36 235 ლარის ოდენობის შემოწირულება მიიღო „ევროპულმა საქართველომ“. „ეროვნულ დემოკრატიულმა პარტიამ“ შემოწირულობის სახით 11 092 ლარი მიიღო, „გირჩმა“ - 8 300 ლარი; ალექსანდრე ელისაშვილის საარჩევნო ფონდმა - 3 120 ლარი; „ერთიანმა ნაციონალურმა მოძრაობამ“ - 102 ლარი; „რესპუბლიკურმა პარტიამ“ - 20 ლარი.