ანრი ოხანაშვილი: სასჯელაღსრულების დაწესებულება პატიმარ სააკაშვილის ბადრაგირებას უზრუნველყოფს - რა თქმა უნდა, ეცდებიან რადიკალიზაციას, მაგრამ თუ ვინმე გაბედავს და კანონს გადააბიჯებს, ამას პასუხს თავად კანონი გასცემს

პარლამენტის იურიდიული კომიტეტის თავმჯდომარის, ანრი ოხანაშვილის განცხადებით, მსჯავრდებული ექსპრეზიდენტის სასამართლო პროცესთან დაკავშირებით, რადიკალური ოპოზიცია ვითარების დაძაბვას ეცდება და თუ ვინმე კანონს დაარღვევს, ამისთვის პასუხისგება მოუწევს.

„საჯაროდ გაჟღერებული ინფორმაციით, სასჯელაღსრულების დაწესებულება პატიმარ სააკაშვილის ბადრაგირებას უზრუნველყოფს. შესაბამისად, მას ექნება შესაძლებლობა, რომ ამ პროცესში მონაწილეობა მიიღოს. აღსანიშნავია ისიც, რომ მას აქამდეც ჰქონდა შესაძლებლობა, დისტანციურად ან უშუალოდ დაწესებულებაში მიეღო პროცესში მონაწილეობა, რაზეც მან უარი თქვა. რა თქმა უნდა, შესაბამისი დაწესებულება, ამ გადაწყვეტილებას ყოველ კონკრეტულ შემთხვევაში იღებს. ამიტომ, მოხდება მისი ბადრაგირება და წარიმართება სასამართლო პროცესი. რა თქმა უნდა, ეცდებიან რადიკალიზაციას, მაგრამ თუ ვინმე გაბედავს და კანონს გადააბიჯებს, ამას პასუხს თავად კანონი გასცემს. შესაბამისი სცენარისთვის, ყველა დაწესებულება, ყველა შესაბამისი ინსტიტუცია მზადაა. ცხადია, არავის არ მიეცემა საზოგადოებრივი უსაფრთხოების კითხვის ნიშნის ქვეშ დაყენების შესაძლებლობა“, - განაცხადა ანრი ოხანაშვილმა „ქრონიკასთან“ საუბრისას.

დღეს, 7 ნოემბრის აქციის დარბევის, ტელეკომპანია „იმედში“ შეჭრისა და ბადრი პატარკაციშვილის ქონების დაუფლების საქმეზე მიხეილ სააკაშვილის სასამართლო პროცესი გაიმართება. სხდომა 11:00 საათზეა დანიშნული. საქმეს 3 მოსამართლე განიხილავს.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს.

მიხეილ სააკაშვილი სამი ინსტანციის სასამართლოს განაჩენით, დამნაშავედ არის ცნობილი ვალერი გელაშვილის ცემისა და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა ექვსი წლის ვადით. ასევე, მიხეილ სააკაშვილი ბრალდებულია ტელეკომპანია „იმედის“ დარბევის, 7 ნოემბრის დარბევისა და პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის პირადი მიზნებისთვის გაფლანგვის ფაქტებზე.