იუსტიციის მინისტრი: ჩვენ გვქონდა მყარი არგუმენტები, თუ რატომ გასაჯაროვდა პატიმარ მიხეილ სააკაშვილის პირადი ცხოვრების კადრები - საბოლოოდ, ამ გადაწყვეტილების კანონიერება სასამართლომ უნდა შეაფასოს

იუსტიციის მინისტრმა რატი ბრეგაძემ კომენტარი გააკეთა იუსტიციის სამინისტროს მიერ სახელმწიფო ინსპექტორის აპარატის დასკვნის გასაჩივრების თაობაზე და მისი მიზეზები განმარტა. იუსტიციის მინისტრის განცხადებით, სპეციალურ პენიტენციურ სამსახურს ჰქონდა და აქვს მყარი არგუმენტები, თუ რატომ გასაჯაროვდა პატიმარ მიხეილ სააკაშვილის პირადი ცხოვრების კადრები. მისი თქმით, საბოლოოდ, ამ გადაწყვეტილების კანონიერება უნდა შეაფასოს არა აღმასრულებელმა ან საკანონმდებლო ხელისუფლებამ, არამედ - სასამართლომ. რატი ბრეგაძის განცხადებით, იუსტიციის სამინისტრომ ამიტომაც მიმართა სასამართლოს და სახელმწიფო ინსპექტორის დასკვნა გაასაჩივრა.

„ეს არის სამართლებრივი პროცედურა. ჩვენ გვქონდა განსხვავებული მოსაზრება, რომელიც არის დასაბუთებული და ბუნებრივია, ამაზე გადაწყვეტილება უნდა მიიღოს სასამართლო ხელისუფლებამ, ამაზე გადაწყვეტილებას მიიღებს მოსამართლე“, - თქვა იუსტიციის მინისტრმა.

რატი ბრეგაძემ კიდევ ერთხელ განმარტა, რომ პატიმარ მიხეილ სააკაშვილის პირადი ცხოვრების კადრების გასაჯაროება აბსოლუტურად კანონიერი იყო და ემსახურებოდა სახელმწიფოში მართლწესრიგისა და უსაფრთხოების დაცვის ინტერესებს.

„ღრმად ვართ დარწმუნებულები, რომ გვაქვს მყარი სამართლებრივი პოზიცია. ის გადაწყვეტილება, რომელიც მიღებულია სპეციალური პენიტენციური სამსახურის მიერ, კადრების გამოქვეყნებასთან დაკავშირებით, იყო აბსოლუტურად კანონიერი, ემსახურებოდა მრავალგზის საზოგადოებრივი ინტერესის დაკმაყოფილებასა და საზოგადოება შეცდომაში შეყვანის გამორიცხვას... რაც ეხებოდა სააკაშვილის გლდანის მე-18 დაწესებულებაში გადაყვანას, მათ შორის, ფაფებისა და წვენების ეპიზოდს. ეს ემსახურებოდა სახელმწიფოში მშვიდობის, მართლწესრიგისა და უსაფრთხოების ინტერესებს“, - განაცხადა მინისტრმა.