სამხედრო ჰოსპიტლის ექიმის თქმით, როდესაც მიხეილ სააკაშვილმა გაიგო, რომ სტაციონარიდან გაწერეს, წნევამ აუწია და, მდგომარეობის დასტაბილურებამდე, ჰოსპიტალში დატოვეს

გორის სამხედრო ჰოსპიტლის ექიმი, მალხაზ ურთქმელიძე აცხადებს, რომ მას შემდეგ, რაც მიხეილ სააკაშვილს სტაციონარიდან გაწერის შესახებ აცნობეს, ის დაიძაბა და „არტერიული წნევის მატება აღენიშნა“. მისი თქმით, სწორედ ამ გარემოების გამო, მდგომარეობის დასტაბილურებამდე მისი ჰოსპიტალში დატოვება გადაწყვიტეს.

„მიხეილ სააკაშვილი ჩვენს კლინიკაში 20 ნოემბერს მოთავსდა, ჩაუტარდა ყველა საჭირო ინსტრუმენტული კვლევა, გამოტანილია სათანადო დიაგნოზები. მიმდინარეობდა მკურნალობა. ამ დღეების განმავლობაში, იგი მუდმივი მონიტორინგის ქვეშ იყო. დაწყებული იყო რეფიდინგის პროცესიც, რომელიც 14 დეკემბერს დასრულდა. მისი მდგომარეობა შეფასდა, როგორც სტაბილური, მის ჯანმრთელობას საფრთხე არ ემუქრებოდა. მიღებულია გადაწყვეტილება პაციენტის ამბულატორიულ მკურნალობასა და სტაციონარიდან გაწერის შესახებ. თუმცა მისი ინფორმირების შემდეგ, პაციენტი დაიძაბა და აღენიშნა არტერიული წნევის მატება, რის გამოც ის დატოვეს ჰოსპიტალში მისი მდგომარეობის დასტაბილურებამდე“, - განაცხადა მალხაზ ურთქმელიძემ.

იგივე შინაარსის განცხადება ცოტა ხნის წინ პენიტენციურმა სამსახურმაც გაავრცელა. უწყება განმარტავს, რომ 27 დეკემბერს, მიხეილ სააკაშვილის მკურნალობის დასრულების შემდგომ, სამედიცინო პერსონალმა მიიღო გადაწყვეტილება გორის სამხედრო ჰოსპიტალიდან მიხეილ სააკაშვილის გაწერის შესახებ, თუმცა ის არ დაემორჩილა კანონიერ მოთხოვნას რუსთავის N12 დაწესებულებაში გადაყვანის შესახებ. „აღელვების ნიადაგზე, მას აღენიშნებოდა წნევის ცვალებადობა, რის შედეგადაც სპეციალურმა პენიტენციურმა სამსახურმა გადაწყვიტა, კანონიერი გადაყვანის ღონისძიება დროებით გადავადდეს“, - აღნიშნულია სამსახურის განცხადებაში.