ბექა ძამაშვილი: დღევანდელი გადაწყვეტილების შემდეგ საქართველომ სუფთად მოიგო სამართლებრივი ომი რუსეთის ფედერაციის წინააღმდეგ

ბექა ძამაშვილმა საქართველოს ადამიანის უფლებათა ევროპული სასამართლოს განაჩენზე „ქრონიკაში“ ისაუბრა. იუსტიციის მინისტრის მოადგილემ აღნიშნა, რომ ხელისუფლება ვალდებულად მიიჩნევდა საკუთარ თავს ქვეყნისა და სამხედროების სიმართლე საერთაშორისო სასამართლოს წინაშე დაემტკიცებინა.

ძამაშვილმა გაიხსენა, რომ საერთაშორისო სასამართლოებმა 2008 წლის ომთან დაკავშირებით საქართველოს სასარგებლო განაჩენები აქამდეც გამოიტანეს, თუმცა ამ შემთხვევაში სარჩელები რუსეთის ფედერაციის კოორდინირებით საქართველოს წინააღმდეგ იყო შეტანილი.

„ამ პროცესში კიდევ უფრო მეტი გამოწვევის წინაშე იყო ჩვენი სახელმწიფო, რადგან ერთია, როდესაც ჩვენ ვუჩივით და მოპასუხე რუსეთია და ამ შემთხვევაში შეიძლება წარმატების შანსი გაცილებით დიდი იყო. მაგრამ როდესაც ჩვენ ვართ მოპასუხე და საუბარია ჯამში 3 300 საჩივარზე, რომელიც რუსეთის კოორდინაციით საქართველოს წინააღმდეგ შეიტანეს, რისკი იყო, რომ თუნდაც ერთში საქართველოს პასუხისმგებლობა რომ დადგენილიყო, ეს მნიშვნელოვნად შეარყევდა საქართველოს წარმატებას საერთაშორისო ასპარეზზე. შესაბამისად, დღევანდელი გადაწყვეტილება მნიშვნელოვანია იმ კუთხით, რომ ეს იყო ფაქტობრივად ბოლო 300 საქმე, რომელიც შეეხებოდა 2008 წლის აგვისტოს ომი აქტიური საბრძოლო მოქმედებებს დროს საქართველოს წინააღმდეგ შეტანილ საჩივრებს. მარტივი ენით რომ ვთქვა, დღევანდელი გადაწყვეტილების შემდეგ შეიძლება ითქვას, რომ საქართველომ სუფთად მოიგო სამართლებრივი ომი რუსეთის ფედერაციის წინააღმდეგ“, - განაცხადა ძამაშვილმა.

ადამიანის უფლებათა ევროპულმა სასამართლომ რუსეთის კოორდინაციით, ცხინვალის რეგიონში მცხოვრები მოსახლეობის მიერ საქართველოს წინააღმდეგ წარდგენილ 370 ინდივიდუალურ საჩივარზე განჩინება გამოაქვეყნა და საჩივრები დაუშვებლად გამოაცხადა.