სერგეენკო: ჩამოვარდნილი ვერტმფრენის წევრები კლინიკიდან უახლოეს საათებში გაეწერებიან

„ბორჯომის ხეობაში ვერტმფრენის წყალში ჩავარდნის შედეგად დაშავებულები ღუდუშაურის კლინიკიდან უახლოეს საათებში ბინაზე გაეწერებიან“, - აცხადებს შრომის, ჯანმრთელობისა და სოციალური დაცვის მინისტრი დავით სერგეენკო ჟურნალისტებთან საუბრის დროს. 

ჯანდაცვის მინისტრი ამბობს, რომ დაშავებულებს მხოლოდ ზედაპირული დაზიანებები აღენიშნებათ. შესაბამისად, მათ სიცოცხლეს საფრთხე არ ემუქრება და ისინი უახლოეს საათებში გაეწერებიან.

პირველადი ინფორმაციით, წყლის აღების დროს, ვერტმფრენს ჩამოვარდნის საფრთხე შეექმნა. მფრინავების პროფესიონალური და ოპერატიული მოქმედების შედეგად, შესაძლებელი გახდა ვერტმფრენის დასმა, რითაც თავიდან იქნა აცილებული უდიდესი ტრაგედია. იმის გამო, რომ კალათა წყლით იყო სავსე, ავარიული დაშვება წყალზევე განხორციელდა.

პრევენციისა და შემდგომი გამოკვლევის მიზნით, ვერტმფრენში მყოფი ეკიპაჟის 4 წევრი თბილისში, სამკურნალო დაწესებულებაში გადაჰყავთ. მათ სიცოცხლეს საფრთხე არ ემუქრება.

შსს-ს სასაზღვრო პოლიციის კუთვნილ ვერტმფრენს - „მი-8“ - ს სარეგლამენტო შემოწმება 2 დღის წინ, 25 აგვისტოს ჩაუტარდა. მოცემულ დროს, ვერტმფრენის ძრავი სრულ წესრიგში იმყოფებოდა. ბორჯომის ხეობაში ხანძრის სალიკვიდაციო სამუშაოების დროს აღნიშნულმა ვერტმფრენმა 600-მდე გაფრენა განახორციელა და ცეცხლის კერებს 1300-მდე ტონა წყალი დაასხა. ფაქტზე გამოძიება შსს-მ სსკ-ს 275-ე მუხლის პირველი ნაწილით დაიწყო.