ვახტანგ გომელაურს პოლონეთის პოლიციის მთავარმა კომენდანტმა პოლიციელის დღე მიულოცა

საქართველოს შინაგან საქმეთა მინისტრს, ვახტანგ გომელაურს და ქართველ პოლიციელებს პოლონეთის პოლიციის მთავარი კომენდანტმა, გენერალმა იაროსლავ შიმჩიკმა პოლიციის დღე მიულოცა.

„პატივცემულო მინისტრო, მსურს, თქვენ და საქართველოს თითოეულ პოლიციელს მივულოცო პოლიციელის დღე და ვუსურვო კეთილდღეობა. ქართველები და პოლონელები არიან ერები, რომლებსაც აქვთ ერთნაირი პრინციპები, თავისუფლების სიყვარული და პატრიოტიზმი. ჩვენი ერები წლების განმავლობაში იბრძოდნენ თვითმმართველობის უფლებისა და საკუთარი სახელმწიფოებრიობისთვის, ამიტომ, ჩვენი სამშობლოს სუვერენიტეტი და დამოუკიდებლობა ჩვენთვის ყველაზე ღირებული საგანძურია, ისევე, როგორც ჩვენი ქვეყნის ყველა მოქალაქის უსაფრთხოება“, - წერს იაროსლავ შიმჩიკი მისალოც წერილში.

პოლონეთის პოლიციის მთავარმა კომენდანტმა წერილში ხაზი გაუსვა ორ ქვეყანას შორის საპოლიციო მიმართულებით არსებულ მჭიდრო და წარმატებულ თანამშრომლობას.

„მიხარია ის ფაქტი, რომ ჩვენი ერების რთული და ურთიერთდაკავშირებული ისტორიების გახსენებისას, ვაგრძელებთ თანამშრომლობას შიდა უსაფრთხოების სფეროში, საერთო მიზნების მისაღწევად. ვაფასებ თანამშრომლობას საქართველოსა და პოლონეთის საპოლიციო ძალებს შორის დანაშაულთან ბრძოლის სფეროში, რომელიც ეყრდნობა ურთიერთნდობასა და პარტნიორობას.

დარწმუნებული ვარ, რომ ჩვენს უწყებებს შორის არსებული წარმატებული თანამშრომლობა მყარ საფუძველს იძლევა საფრთხეებისა და გამოწვევების წინააღმდეგ ეფექტური ბრძოლისთვის, ასევე, ჩვენი მოქალაქეების უსაფრთხოების უზრუნველსაყოფად. პატივცემულო მინისტრო, მსურს კიდევ ერთხელ დაგიდასტუროთ მზაობა ჩვენს უწყებებს შორის არსებული თანამშრომლობის შემდგომი განვითარების კუთხით. ვსარგებლობ შემთხვევით და მინდა, კიდევ ერთხელ მოგილოცოთ პოლიციელის დღე, გისურვოთ წარმატებები პირად ცხოვრებასა და პროფესიულ საქმიანობაში თქვენ და საქართველოს პოლიციის თითოეულ ოფიცერს“, - აღნიშნულია მისალოც წერილში.