თამარ ზაალიშვილი „TV პირველისთვის“ მოგებულ დავაზე: უმნიშვნელოვანესი გადაწყვეტილებაა - სიუჟეტში წარმოდგენილი თითოეული მოსაზრება, თითოეული განცხადება აბსოლუტური სიცრუე და ცილისმწამებლურია

„ეს არის უმნიშვნელოვანესი გადაწყვეტილება. დავის საგანი ეხება ისეთ უმნიშვნელოვანეს სფეროს, როგორიცაა განათლების ხარისხის განვითარების სფერო, განათლების სისტემა“, - ასე გამოეხმაურა პროფესორი თამარ ზაალიშვილი საქალაქო სასამართლოს მიერ დღეს მიღებულ გადაწყვეტილებას.

მისივე თქმით, „TV პირველმა“, მის საქმიანობასთან დაკავშირებით, ცილისმწამებლური ინფორმაცია მიზანმიმართულად გაავრცელა.

„შესაბამისი დოკუმენტაცია გამოთხოვილი იყო ყველა სათანადო ინსტიტუციიდან, რომელსაც კი შეიძლებოდა, რაიმე შემხებლობა ჰქონოდა თეატრალური ინსტიტუტის დიპლომების ნამდვილობის დადასტურებათან. სწორედ ამ დოკუმენტაციის საფუძველზეც, სასამართლომ ეს გადაწყვეტილება მიიღო. ეს არის ჩემი ღრმა რწმენა და ვფიქრობ, რომ ეს არის უმნიშვნელოვანესი გადაწყვეტილება. დავის საგანი ეხება ისეთ უმნიშვნელოვანეს სფეროს, როგორიცაა განათლების ხარისხის განვითარების სფერო, განათლების სისტემა. ვფიქრობ, თითოეული მოქალაქის ვალია, საზოგადოება სიცრუეში არ ამყოფოს და მას სიმართლე უთხრას. შეიძლება ითქვას, რომ ამ სიუჟეტში წარმოდგენილი თითოეული მოსაზრება, თითოეული განცხადება აბსოლუტური სიცრუე და ცილისმწამებლურია, რადგან არსებითად მცდარი ფაქტების შემცველი ინფორმაციებით გავიდა სიუჟეტი. თუნდაც მტკიცებულებებით დადასტურდა, რომ არსებობდა ერთადერთი მიზანი - ეს იყო ვიწროსუბიექტური ინტერესებიდან გამომდინარე, რათა ჩემი პატივი, ღირსება და საქმიანი რეპუტაცია შეელახათ“, - აცხადებს თამარ ზაალიაშვილი.

პროფესორმა თამარ ზაალიშვილმა ტელეკომპანია „პირველს“ სასამართლოში დავა მოუგო. ზაალიშვილის მტკიცებით, რომელიც განათლების ხარისხის ეროვნული ცენტრის დირექტორის ყოფილი მოადგილეა, ცილისმწამებლურია ტელეკომპანიის მიერ გავრცელებული ინფორმაცია, რომ ის ყალბ დიპლომებს საკუთარი ხელმოწერით ადასტურებდა. მოსარჩელის თქმით, ცრუ ინფორმაციის გავრცელება მისი და თავისი შვილის - ირაკლი კობახიძის რეპუტაციისთვის ზიანის მიყენება იყო.

ზაალიშვილი ტელეკომპანიისგან კომპენსაციის სახით, სიმბოლურად, 5 555 ლარს, პროდიუსერისა და ჟურნალისტისგან (ნოდარ მელაძისგან და მაკა ჩიხლაძისგან) კი 5-5 ლარს ითხოვდა. ის ასევე უჩიოდა მარინე მიქაუტაძეს, რომელიც თეატრალური უნივერსიტეტის ყოფილი თანამშრომელია და სიუჟეტში რესპონდენტი იყო. სასამართლომ მასაც 5 555 ლარის გადახდა დააკისრა.