ყოფილი მძევალი თავდამსხმელზე: პერიოდულად, თანხა რომ არ მოჰქონდათ და რომ აგვიანდებოდათ, ძალიან აგრესიული იყო, ისე, ნამდვილად არ გვერჩოდა, უნდოდა, რომ ყველა უვნებლად გავსულიყავით

ქუთაისში, „საქართველოს ბანკზე“ თავდასხმისას მძევლად აყვანილი ერთ-ერთი პირი, ეკა შელია გუშინ განვითარებულ მოვლენებს მედიასთან იხსენებს. მისი თქმით, თავდამსხმელმა არაფერი იცოდა იმ კარის შესახებ, საიდანაც, საბოლოოდ, მძევლები გავიდნენ.

„არ იცოდა [მძარცველმა], მაინც ვერ გაიგო, რომ იქ კარები იყო ღია და სპეცრაზმს რომ გაჰყავდა [ხალხი], მიხვდა. პერიოდულად, განერვიულდებოდა ხოლმე და იყო რისკი, რომ რომელიმე მძევლისთვის რამე მოეწია. პერიოდულად, თანხა რომ არ მოჰქონდათ და რომ აგვიანდებოდათ, ძალიან აგრესიული იყო. ისე, ნამდვილად არ გვერჩოდა, უნდოდა, რომ ყველა უვნებლად გავსულიყავით. ხმაურზე გავიქეცით ყველა და შემდეგ შემოვიდა პოლიცია“, - აცხადებს ყოფილი მძევალი.

20 სექტემბერს განვითარებულ მოვლენებს იხსენებს მძევლად აყვანილი კიდევ ერთი პირი, ვანო ხეცურიანი.

„ყველაფერი ზურგჩანთით შემოიტანა, გარეთ ისროლა, შემოვიდა, კარი მიხურა, გაიძრო [მოსაცმელი], შევხედეთ რაც ეცვა, იარაღით ხელში იყო... ზურგჩანთიდან ამოიღო ხელყუმბარები, კედელზე მიამაგრა. თვითონ მომთხოვა, რომ „ლაივი“ ჩამერთო, გაიგოს ყველამო. როგორც კი შემოვიდა პოლიციის კორდონი, იმ წუთში გავედი გარეთ. ჩვენ პოლიციის ყველა მოქმედებას ვუყურებდით. კარი, რომლიდანაც შემოვიდნენ, ალბათ ძველი კარი იყო და ის კარი გახსნა პოლიციამ. ტუალეტი იყო იქ, რომელში გასვლასაც ხალხი ითხოვდა და მოდიოდნენ უკან, მაგრამ მერე ორი ბიჭი გავიდა, მერე ქალი გავიდა, მერე მესამე გოგო გავიდა, მეოთხე ქალი გავიდა და რომ აღარ დაბრუნდნენ, მერე დაეჭვდა და მიხვდა, რომ რაღაცაში იყო საქმე“, - აცხადებს ყოფილი მძევალი.

მძევლად აყვანილი კიდევ ერთი პირი, ლევან ასათიანი ამბობს, რომ მძევლებმა შენობიდან გამოსვლა სამართალდამცველების დახმარებით შეძლეს.

„გამოვედი უკანა კარიდან, რომლის შესახებაც იმან [თავდამსხმელმა] არაფერი იცოდა. პოლიციამ გააღო კარი, გახსნა ტერიტორია, შევხედე, რომ პოლიციელები იყვნენ, გვითხრეს, გამოდიო და გამოვედით. ჩემ გარდა, იქამდე, ორი თანამშრომელი გოგო გამოვიდა და შემდეგ გამოვყევით ჩვენ. გამოვეპარეთ, მაგრამ ეს იყო თანამშრომლების დამსახურება, რადგან მათ გახსნეს ის კარი. დალუქული იყო ის კარი და ალბათ რაღაცით გახსნეს ან გაჭრეს და გამოგვიყვანეს“, - აცხადებს ასათიანი.

ქუთაისში, „საქართველოს ბანკის“ ფილიალზე თავდამსხმელს, ბრალს ოფიციალურად დღეს წარუდგენენ. გრიგოლ ნარსია ამ დროისათვის წინასწარი დაკავების იზოლატორშია. იმერეთის სამხარეო პოლიციაში კი, მძევლების გამოკითხვები დილიდან განახლდა.

ბანკის ფილიალში შეიარაღებული პირი 20 სექტემბერს, დილით შეიჭრა. ის 2 მილიონ დოლარს ითხოვდა და აცხადებდა, რომ ბანკში ასაფეთქებელი მოწყობილობები დაამონტაჟა.

თავდასხმის შედეგად, არავინ დაშავებულა.