ნიკოლოზ ბასილაშვილის ადვოკატი: სანდოობის ტესტის გავლის დროს, როგორ უნდა გავითვალისწინოთ დაზარალებულ ნელი დოროყაშვილის ჩვენება, რომელმაც სასამართლო დარბაზში, მოსამართლის თანდასწრებით, სისხლის სამართლის დანაშაული ჩაიდინა?

ჩოგბურთელ ნიკოლოზ ბასილაშვილის ადვოკატის, თეონა გვაზავას თქმით, სპორტსმენის ყოფილმა მეუღლემ, სასამართლოს ცრუ ჩვენება მისცა, რაც სისხლის სამართლის დანაშაულია.

„ჩვენ, სანდოობის ტესტის გავლის დროს, როგორ უნდა გავითვალისწინოთ დაზარალებულ ნელი დოროყაშვილის ჩვენება, რომელმაც სასამართლო დარბაზში, მოსამართლის თანდასწრებით, სისხლის სამართლის კოდექსით გათვალისწინებული დანაშაული ჩაიდინა? ნელი დოროყაშვილი ცალსახად გვიმტკიცებს, რომ ნიკოლოზ ბასილაშვილმა, ძალადობის განხორციელების შემდეგ, რაც გამოიხატებოდა თმებით თრევაში, იატაკზე ხოხიალსა და სხვადასხვა ძალადობაში, მიიღო მხოლოდ და მხოლოდ სიწითლეები, სილურჯეები არ ჰქონია. ეს პირველ ჩვენებაში... შემდეგ გადააკეთა, რომ თავზე, მუცელსა და მკერდის არეში რაღაც დაზიანება ჰქონდა. თან, გვიმტკიცებს, რომ ჩანთაში, რომელიც ნიკოლოზ ბასილაშვილმა აიღო, 20 ჩოგანი ეტევაო. თვით საბა დოროყაშვილიც ამბობს, რომ როდესაც აეროპორტში წავსულვარ და გამიცილებია, იმდენად მძიმე იყო ეს ჩემოდანი, რომ ძლივს ვწევდიო. ანუ ჩემოდანმა, რომელიც სავსეა ჩოგნებით და რომელიც ნიკოლოზ ბასილაშვილმა ნელი დოროყაშვილს ესროლა, მის სხეულზე რაიმე სახის სერიოზული დაზიანება არ დატოვა“, - განაცხადა თეონა გვაზავამ.

თბილისის საქალაქო სასამართლოში ნიკოლოზ ბასილაშვილის საქმის დასკვნითი სხდომა მიმდინარეობს. ორწლიან დავაზე გადაწყვეტილებას მოსამართლე ხვალ გამოაცხადებს.

ბრალდების მხარის მტკიცებით, ბასილაშვილის მხრიდან მისი მეუღლე როგორც ფსიქოლოგიური, ასევე ფიზიკური ძალადობის მსხვერპლი იყო. პროკურორის თქმით, ხშირად ოჯახურ კონფლიქტს არასრულწლოვანი შვილიც ესწრებოდა.