დევიდ სმიტი ადასტურებს, რომ ლაბორატორიის კვლევაში, რომელსაც მიხეილ სააკაშვილის ჯანმრთელობის მდგომარეობასთან დაკავშირებით საკუთარ დასკვნაში ეყრდნობა, დარიშხანი არ აღმოჩნდა

საქალაქო სასამართლოში მიხეილ სააკაშვილის საქმეზე სასამართლო სხდომა უკვე ექვსი საათია მიმდინარეობს. დისტანციურად იკითხება ის ამერიკელი ტოქსიკოლოგი, რომელმაც დასკვნაში დაწერა, რომ სააკაშვილი მოწამლულია.

პენიტენციური სამსახურის სამედიცინო დეპარტამენტის ხელმძღვანელი მალხაზ ურთმელიძე სასამართლო პროცესზე დაინტერესდა, ამერიკელ ექსპერტს წარედგინა ის კვლევის შედეგები, რის საფუძველზეც იგი პატიმარ მიხეილ სააკაშვილის ფრჩხილსა და თმაში დარიშხანისა და ვერცხლისწყლის შემცველობაზე საუბრობდა.

ამერიკელმა ექსპერტ-ტოქსიკოლოგა, დევიდ სმიტმა დაადასტურა, რომ ერთ-ერთი სამედიცინო ლაბორატორიის (LMS) კვლევაში, რომელსაც მიხეილ სააკაშვილის ჯანმრთელობის მდგომარეობასთან დაკავშირებით საკუთარ დასკვნაში ეყრდნობა, დარიშხანი არ აღმოჩნდა.

მისივე თქმით, კვლევაში ძირითადი აქცენტი გაკეთებული იყო ვერცხლისწყლის შემცველობაზე, რომლის კონცენტრაცია დასაშვებ ნორმაზე 50%-ით მეტი, 0.12% იყო.

„დარიშხანი ძალიან სწრაფად ქრება, მაშინ, როდესაც ვერცხლისწყალი უფრო დიდი ხნით რჩება“, - განაცხადა დევიდ სმიტმა.

მოსამართლის დაინტერესდა, რომელი კვლევის საფუძველზე აქვს მოხსენიებული ამერიკელ ექსპერტს საკუთარ დასკვნაში სააკაშვილის ორგანიზმში სავარაუდოდ, აღმოჩენილ მეტალებს შორის დარიშხანი.

„დასკვნის პირველივე აბზაცში უწერია, რომ ტესტირებამ გამოავლინა მძიმე მეტალებისა და ნივთიერებების, მათ შორის ვერცხლის წყლისა და დარიშხანის არსებობა თმასა და ფრჩხილების ნიმუშებში. აი, ეს წინადადება საიდან ჩაწერეთ“, - იკითხა მოსამართლემ სხდომაზე.

ექსპერტმა კითხვას კონკრეტული პასუხი ვერ გასცა და თქვა, რომ მის დასკვნაში საუბარია „LMS-სა და ასევე ერთ-ერთ გერმანულ ლაბორატორიაზე“.

„ნახსენებია LMS ლაბორატორია, ასევე სახეზე იყო გერმანული ლაბორატორია, რომლის სახელსაც ვერ ვპოულობ. დარიშხანი სწრაფად განიცდის მეტაბოლიზებას, მაგრამ არის ტოქსიკური და ეს კლინიკურ სურათს იძლევა. თუმცა, ძირითადი აქცენტი კეთდებოდა ვერცხლისწყალზე. შესაძლოა, დარიშხანის კონცენტრაცია არ იყოს ლეტალური, ანუ სასიკვდილო, მაგრამ იყოს ტოქსიკური“, - განაცხადა დევიდ სმიტმა.

ამასთან, სხდომაზე მალხაზ ურთმელიძე დაინტერესდა სააკაშვილის სისხლში მძიმე მეტალების შემცველობით, რომელიც ამერიკელმა ექსპერტმა წარადგინა.

„მიხეილ სააკაშვილს აღმოაჩნდა სისხლში ბარიუმი 0,50, ნორმა არის 2. ვერცხლისწყალი აღმოაჩნდა 0,12. ნორმა გახლავთ 2მკ.გრ-1გრ-ზე. რატომ შეადარეთ რეპორტის ციფრები მიღებულ შედეგებს?“, - იკითხა პენიტენციური სამსახურის სამედიცინო დეპარტამენტის ხელმძღვანელმა.

დევიდ სმიტის თქმით, პირველი ინტოქსიკაციის დროს სისხლში ცვლილებები იყო.

„სადღაც, სადაც მოხდა პირველი ინტოქსიკაცია, კონცენტრაცია იყო მაღალი, რომელმაც დაიწყო ეს პათოლოგიური ცვლილებები და შემდეგ დაიწყო კონცენტრაციამ კლება და მივედით იმ დონემდე, სადაც კონცენტრაცია არის დაბალი“, - დასძინა ამერიკელმა ექსპერტმა.

თავის მხრივ მოსამართლე დაინტერესდა, სააკაშვილის სისხლში ვერცხლის წყლის შემცველობა 0,12 წარმოადგენს თუ არა ნორმას, მაშინ როდესაც ეს ნივთიერება ადამიანის სისხლში ზოგადად, 2-მდე ნორმის ფარგლებში ითვლება.

დევიდ სმიტის თქმით, სააკაშვილის თავის ტვინის მდგომარეობის შესახებ მას აღწერილი აქვს ნევროლოგიური კვლევის დოკუმენტებში, რაც დართული აქვს მის დასკვნას და მეტის თქმა ამ ეტაპზე არ შეუძლია.

„ჩვეულებრივ მარტივ კითხვას ვსვამ - ნორმა არის მითითებული. ნორმაზე ქვევით არის ეს მაჩვენებელი. რატომ ვსაუბრობთ აქ მოწამვლაზე“, - განაცხადა სხდომაზე მალხაზ ურთმელიძემ.

ამასთან, სასამართლო სხდომაზე თავის მხრივ პროკურორი დაინტერესდა, სააკაშვილის ტვინში თეთრი ნივთიერების შემცირების შესახებ დასკვნითაც. მან აღნიშნა, რომ დევიდ სმიტის დასკვნაში აღნიშნული თეთრი ნივთიერების შემცირება ინსტრუმენტალური კვლევებით დაფიქსირებული არ არის.