მუსტაფაევა: პროკურატურამ ვერ შეძლო იმ პირთა პოვნა, ვინც გვითვალთვალებდნენ

აზერბაიჯანელი ჟურნალისტის - აფგან მუხტარლის მეუღლემ ლეილა მუსტაფაევამ პროკურატურაში გამოკითხვის შემდეგ განაცხადა, რომ სამართალდამცველებმა ვერ შეძლეს იმ ადამიანების პოვნა, ვინც მუხტარლის უთვალთვალებდა. მუსტაფაევამ არ გამორიცხა, რომ მათ ხელს აფარებენ. 

”სოციალური ქსელის საშუალებით ჩვენ მოვახერხეთ ამ ხალხის ამოცნობა. მანამდე ჩვენ ეს ფოტოები გადავაგზავნეთ პროკურატურაში. გუშინ დამირეკა გამომძიებელმა ირაკლი აბულაძემ და მე ვკითხე მას ამ ფოტოების შესახებ, რომელმაც მიპასუხა, რომ მათ ვერ შეძლეს ამოცნობა. მე ვუთხარი, რომ ჩვენ თავად მოვახერხეთ მათი ამოცნობა. ამის შემდეგ დამიბარეს პროკურატურაში."- განაცხადა ლეილა მუსტაფაევამ ჟურნალისტებთან საუბარში.

მისივე თქმით, ეს პირები უკვე ბაქოში იმყოფებიან და ორივე აზერბაიჯანელია. 

აზერბაიჯანელი ჟურნალისტის - აფგან მუხტარლის მეუღლე ლეილა მუსტაფაევა და მუხტარლის ადვოკატი არჩილ ჩოფიკაშვილი დღეს მთავარ პროკურატურაში გამოკითხვაზე იმყოფებოდნენ. 

აზერბაიჯანელი ჟურნალისტის - აფგან მუხტარლის ადვოკატმა და მისმა მეუღლემ 19 სექტემბერს იმ პირების ამსახველი ფოტო და ვიდეომასალა გაასაჯაროეს, რომლებიც მათი თქმით, აზერბაიჯანელ ჟურნალისტს და მის მეგობარს - დაშგინ აღალარლის გატაცებამდე უთვალთვალებდნენ.

აფგან მუხტარლი თბილისიდან 29 მაისს გაუჩინარდა. ის აზერბაიჯანში დააკავეს. მას ბაქოს საქალაქო სასამართლომ წინასწარი სამთვიანი პატიმრობა მიუსაჯა, პროკურატურამ ბრალი კონტრაბანდის, სახელმწიფო საზღვრის უკანონო გადაკვეთის და პოლიციისთვის დაუმორჩილებლობის მუხლებით წარუდგინა.

საქართველოში შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.

ქართულმა გამოძიებამ აზერბაიჯანულ მხარეს აფგან მუხტარლის დაკითხვის თხოვნითაც მიმართა, თუმცა ამ დრომდე თხოვნას გამოხმაურება არ მოჰყოლია.მუხტარლის საქმეზე სასაზღვრო პოლიციის უფროსმა და სუს-ის კონტრდაზვერვის უფროსმა თანამდებობები დატოვეს.

აფგან მუხტარლის საქმეზე ევროპარლამენტმა სპეციალური რეზოლუცია მიიღო.