ლაზარე გრიგორიადისს აღკვეთის ღონისძიების სახით პატიმრობა შეეფარდა

საქალაქო სასამართლომ 7-9 მარტის აქციასთან დაკავშირებით დაკავებულ ლაზარე გრიგორიადისს პატიმრობა შეუფარდა. პროცესის მსვლელობისას დაკავებულმა პოზიცია შეიცვალა და დუმილის უფლებით ისარგებლა, თუმცა პროცესის დაწყებამდე მან ბრალი ნაწილობრივ აღიარა.

მოსამართლის გადაწყვეტილებას სასამართლოს შენობაში ხმაური და შეძახილები მოჰყვა, რის შემდეგაც მანდატურებმა ლაზარე გრიგორიადისის მეგობრებს, სამოქალაქო აქტივისტებსა და პოლიტიკოსებს შენობა დაატოვებინეს.

„ქრონიკამ“ მოიპოვა ლაზარე გრიგორიადისის გამოკითხვის ოქმი, რომელშიც პოლიციელზე თავდასხმისა და ნივთის დაზიანების ფაქტებზე დაკავებული დანაშაულს აღიარებს. ლაზარე გრიგორიადისი თავის ჩვენებაში აცხადებს, რომ 7 მარტს საღამოს იმყოფებოდა პარლამენტის შენობის მახლობლად, სადაც აქციაში მონაწილე სხვა პირებთან ერთად აპროტესტებდა პარლამენტის მიერ ინიცირებულ კანონს.

მისივე თქმით, ღამის საათებში, 8 მარტს აქციის მონაწილე მამაკაცებმა დაიწყეს აგრესიის გამოხატვა პოლიციის თანამშრომლებისადმი, „რაც გამოიხატებოდა აქციის მონაწილეების ნაწილის მხრიდან პოლიციის მისამართით სხვადასხვა მყარი საგნის სროლაში - ქვების, ჯოხების, ბოთლების და ა.შ.“

ამის შემდეგ თავის ჩვენებაში ლაზარე გრიგორიადისი ჰყვება, როგორ ისროდა ე.წ. მოლოტოვის კოქტეილებს.

„პარლამენტის შენობის წინ მარცხენა მხარეს 9 აპრილის ქუჩის მიმდებარედ ტროტუარზე შევნიშნე, რომ განთავსებული იყო ორი შუშის ბოთლი, ხოლო მის გვერდით პლასტმასის ბოთლში განთავსებული იყო ბენზინი. მე აღნიშნულ ბოთლებში ჩავასხი ბენზინი, ავიღე ორივე ბენზინით სავსე შუშის ბოთლი და გადავინაცვლე 9 აპრილის ქუჩის მიმდებარედ, სადაც პოლიციის კორდონი იყო გამაგრებული. ბენზინის შუშის ბოთლში განთავსებით კუსტარულად დავამზადე ე.წ. მოლოტოვის კოქტეილი იმ მიზნით, რომ აქციის მონაწილეებსა და პოლციის კორდონს შორის არსებული აგრესია და დაპირისპირება გამენეიტრალებინა. კერძოდ, მინდოდა, რომ ე.წ. მოლოტოვის კოქტეილი მესროლა პოლიციის კორდონსა და აქციის მონაწილეებს შორის არსებულ სივრცეში“, - წერს თავის ჩვენებაში ლაზარე გრიგორიადისი.

ის ასევე აღნიშნავს, რომ მის მიერ ნასროლი პირველი „მოლოტოვის კოქტეილი“ არავის მოხვედრია და არავინ დაზიანებულა, ხოლო რაც შეეხება მეორეს, ლაზარე გრიგორიადისი აცხადებს, რომ არ ახსოვს, გამოიწვია თუ არა ამ ბოთლის სროლამ ვინმეს დაზიანება. დაკავებული ასევე აღნიშნავს, რომ ორივე ბოთლის სროლამ გამოიწვია აალება და მსხვრევა.

ახალგაზრდა, რომელიც გამოძიების მტიკებით, შინაგან საქმეთა სამინისტროს მიერ გავრცელებულ კადრებში, პოლიციელების მისამართით სხვადასხვა საგანს ისვრის, წარსულში ოჯახის წევრის მიმართ ძალადობის მუხლით ნასამართლევი ლაზარე გრიგორიადისია.

პროკურატურის მიერ გავრცელებულ განცხადებაში ნათქვამია, რომ ბრალდებულმა 9 აპრილის ქუჩაზე შს სამინისტროს განსაკუთრებულ დავალებათა დეპარტამენტის თანამშრომლების მიმართულებით, რომლებიც სამსახურებრივ მოვალეობას ასრულებდნენ, ორჯერ ისროლა ე.წ. „მოლოტოვის კოქტეილი“. ასევე, ბრალდებულმა განზრახ წაუკიდა ცეცხლი შინაგან საქმეთა სამინისტროს კუთვნილ ავტომანქანას, რომელიც ადგილზე დაიწვა