ზურაბ ჩხაიძე: პოლონელ კოლეგებთან განვიხილეთ მიხეილ სააკაშვილის მდგომარეობა, ჩატარებული კვლევები, სრულად დაეთანხმნენ ჩვენი მკურნალობის ტაქტიკას, კოლეგიალური შეხვედრა იყო

ერთობლივად განვიხილეთ პაციენტის მიმდინარე მდგომარეობა, ჩატარებული წინა კვლევები. იყო ნამდვილად კოლეგიალური და კეთილგანწყობილი შეხვედრა, განსხვავებით სხვა წინა ექსპერტებისგან, რომლებიც ჩამოდიოდნენ და საერთოდ კომუნიკაცია არ ჰქონდათ, - ამის შესახებ „ვივამედის“ სამედიცინო დირექტორმა, ზურა ჩხაიძემ მიხეილ სააკაშვილთან პოლონელი ექიმების ვიზიტზე საუბრისას განაცხადა.

„მოგეხსენებათ, გუშინ ჩვენს კლინიკაში ვიზიტით იმყოფებოდნენ პოლონელი კოლეგები. ეს იყო ექიმი ნეიროქირურგი და მეორე, შინაგანი მედიცინის სპეციალისტი, ასევე ტოქსიკოლოგი. შემიძლია, ერთმნიშვნელოვნად გითხრათ, რომ ძალიან კმაყოფილი ვარ. ჩვენ, კოლეგები ძალიან კმაყოფილი ვართ, კოლეგიალური შეხვედრა იყო ნამდვილად. ნამდვილად საგნობრივი შეხვედრა იყო. ერთობლივად განვიხილეთ პაციენტის მიმდინარე მდგომარეობა, ჩატარებული წინა კვლევები. იყო ნამდვილად კოლეგიალური და კეთილგანწყობილი შეხვედრა, განსხვავებით სხვა წინა ექსპერტებისგან, რომლებიც ჩამოდიოდნენ და საერთოდ კომუნიკაცია არ ჰქონდათ. არა მარტო უცხოელი ექსპერტები იყვნენ წინათ, თუნდაც იგივე ქართველი ექსპერტები, რომლებსაც ფაქტობრივად არ ჰქონიათ კომუნიკაცია ჩვენი კლინიკის ექიმებთან. მათგან განსხვავებით, იყვნენ ძალიან კომუნიკაბელურები, ძალიან კოლეგიალურები და ერთობლივად განვიხილეთ. რაც შეეხება მიმდინარე მკურნალობას, მე მხოლოდ ზოგადად შემიძლია, გითხრათ, რომ ისინი სრულად დაეთანხმნენ ჩვენი მკურნალობის ტაქტიკას, ჩატარებულ კვლევებს და სხვა დანარჩენ დეტალებზე ალბათ თვითონ გააკეთებენ განცხადებას“,- განაცხადა ჩხაიძემ.

მან ასევე განმარტა, რომ უცხოელი ექიმები დაეთანხმნენ „ვივამედში“ ჩატარებულ კვლევებს და რეკომენდაციებს.

„დამატებით კვლევებს, რაც ჩვენ ჩატარებული გვაქვს, სრულად დაეთანხმნენ. ის, რაც თვითონ რეკომენდაციის სახით მოგვცეს, ჩვენ ეს რეკომენდაცია გვქონდა პაციენტისთვის, მაგრამ პაციენტი მაშინ უარს აცხადებდა იმ კვლევის ჩატარებაზე, თუნდაც ხერხემლის პუნქციის ჩატარება, რომელზეც პაციენტმა არაერთხელ განაცხადა უარი. მათაც ეს შესთავაზეს. სხვა დანარჩენი, მაგალითად კვებასთან დაკავშირებული საკითხები, ეს ყველაფერი იყო ჩვენი საერთო აზრი და საერთო გადაწყვეტილება, რის შესახებაც ისინი ესაუბრნენ პაციენტს“, - აღნიშნა ჩხაიძემ.

მიხეილ სააკაშვილი „ვივამედში“ ევროკავშირის სამედიცინო მისიამ მოინახულა. 5 პოლონელი ექიმით დაკომპლექტებულმა სამედიცინო გუნდმა, მას კვლევები ჩაუტარა. პატიმრის გასინჯვის პარალელურად, ინფორმაცია მიიღეს კლინიკის მედპერსონალისგანაც. მედიკოსებმა, კლინიკა წუხელ უკომენტაროდ დატოვეს. სააკაშვილის ოჯახის განცხადებით, ისინი ჯერჯერობით კვლევის დეტალებზე ვერ ისაუბრებენ და არც მის შედეგებს გაასაჯაროებენ.