ვახტანგ ბაჩიაშვილი: პრეზიდენტმა მთავრობას 71-ჯერ მიმართა და ყველა წინადადება იწყება კონსტიტუციის 52-ე მუხლის პირველი პუნქტის „ა“ ქვეპუნქტზე მითითებით, რითაც დასტურდება, რომ მას გაცნობიერებული აქვს მთავრობის თანხმობის სავალდებულოობა

პრეზიდენტმა მთავრობას მომართა სულ 71-ჯერ და ყველა წერილობითი მიმართვა, რომელიც მთავრობის სახელზეა გამოგზავნილი, გარდა ნარატიული ინფორმაციისა, ასევე შეიცავს სამართლებრივ წინაპირობებსაც, რის საფუძველზე სთხოვს პრეზიდენტი მთავრობას შესაბამისი თანხმობის გაცემას, - ამის შესახებ მთავრობის საპარლამენტო მდივანმა ვახტანგ ბაჩიაშვილმა საკონსტიტუციო სასამართლოს სხდომაზე განაცხადა.

მისი თქმით, პრეზიდენტის ყველა წერილობითი წინადადება იწყება მითითებით და რეფერირებით საქართველოს კონსტიტუციის 52-ე მუხლის პირველი პუნქტის „ა“ ქვეპუნქტზე, რითაც დასტურდება, რომ პრეზიდენტის მხრიდანაც გაცნობიერებულია ყველა ვიზიტთან დაკავშირებით საქართველოს მთავრობის თანხმობის სავალდებულოობა.

„საქართველოს მთავრობა დაინტერესებულია, რომ მიღებული იყოს დასკვნა, რომელიც დაადგენს - იყო თუ არა კონსტიტუცია დარღვეული. აქედან გამომიდინარე, მთავრობის პოზიციას წარმოგიდგენთ: დარღვევის საგანს წარმოადგენს კონსტიტუციის 52 მუხლის პირველი პუნქტის „ა“ ქვე პუნქტი, რომელიც პრეზიდენტისგან მოითხოვს რომ საქართველოს მთავრობის თანხმობით განახორციელოს მან წარმომადგენლობითი უფლებამოსილება საგარეო ურთიერთობებში. აღნიშნული მუხლის კონკრეტიზაცია არის განხორციელებული როგორც შიდა კანონმდებლობაში, საქართველოს მთავრობის სტრუქტურის უფლებამოსილებისა და საქმიანობის წესის შესახებ, ასევე საქართველოს მთავრობის რეგლამენტში, რომელიც გარკვეულ პროცედურულ წესებს ადგენს ამ შემთხვევაში თანხმობის გაცემის პროცესთან დაკავშირებით. აღნიშნული ცვლილებები განხორციელდა 2019 წელს, მას შემდეგ, რაც შევიდა ძალაში ახალი კონსტიტუცია. აღნიშნული ცვლილების პროექტი ასევე შესათანხმებლად გადაგზავნილი იყო პრეზიდენტის ადმინისტრაციაში, მთავრობას პრეზიდენტის ადმინისტრაციის მხრიდან ოფიციალური შენიშვნები არ მიუღია და დღესდღეობით ამ მოდელით ხორციელდება პრეზიდენტისა და მთავრობის ურთიერთობა. კერძოდ, ამ რეგლამენტის შესაბამისად საქართველოს პრეზიდენტი წერილობით მიმართავს მთავრობას, სადაც აღწერილია კონკრეტულ ქვეყანაში განსახორციელებელი ვიზიტი, თარიღები, დღის წესრიგი, კონკრეტული ოფიციალური პირები, ვისთან შეხვედრაც უნდა განხორციელდეს და საქართველოს პრეზიდენტი მთავრობისგან ითხოვს შესაბამისი თანხმობის გაცემას. 2019 წლიდან მოყოლებული დღემდე საქართველოს პრეზიდენტმა მთავრობას მომართა სულ 71-ჯერ და ყველა წერილობითი მიმართვა, რომელიც მთავრობის სახელზეა გამოგზავნილი, გარდა ნარატიული ინფორმაციისა, ასევე შეიცავს სამართლებრივ წინაპირობებსაც, რის საფუძველზე სთხოვს პრეზიდენტი მთავრობას გაიცეს შესაბამისი თანხმობა. პრეზიდენტის ყველა წერილობითი წინადადება იწყება მითითებით და რეფერირებით საქართველოს კონსტიტუციის 52-ე მუხლის პირველი პუნქტის „ა“ ქვეპუნქტზე, რითაც დასტურდება, რომ პრეზიდენტის მხრიდანაც გაცნობიერებულია ამ ყველა ვიზიტთან დაკავშირებით საქართველოს მთავრობის თანხმობის სავალდებულოობა“, - განაცხადა ბაჩიაშვილმა.