მიხეილ სააკაშვილი: ჩემი თხოვნით წავიდნენ ვაშაძე, ცისკარიშვილი, ბოკუჩავა და ამერიკაში ხვდებიან ხალხს, სოფო ჯაფარიძე ევროპაში ხვდებოდა ხალხს, რადგან მეტი ამომრჩეველი გვჭირდება საზღვარგარეთ

„7 ნოემბრის საქმეზე“ საქართველოს ყოფილი პრეზიდენტის მიხეილ სააკაშვილის და მასთან ერთად ბრალდებული ყოფილი მაღალჩინოსნების სასამართლო პროცესი მიმდინარეობს. სხდომას კლინიკიდან დისტანციურად ერთვება მიხეილ სააკაშვილი. დღევანდელ პროცესზე კონკრეტულ მტკიცებულებებს იკვლევენ.

მიხეილ სააკაშვილმა განაცხადა, რომ მან გაუშვა საზღვარგარეთ გიორგი ვაშაძე, თინა ბოკუჩავა და პეტრე ცისკარიშვილი იმისთვის, რომ საარჩევნო სისტემასთან დაკავშირებით უცხოელ პარტნიორებს ესაუბრონ.

„ჩვენ უნდა გვესმოდეს, რომ ესენი [ხელისუფლება] არჩევნებით წასვლას არსად არ აპირებენ. ისინი წავლენ, როდესაც ჩვენ ვიმოქმედებთ ერთმანეთთან შეთანხმებით. ამ სისტემის შეცვლას უნდა მივაღწიოთ ყველამ ერთად. არ გვჭირდება ერთ პარტიაში ყოფნა, არ გვჭირდება, ერთმანეთთან დავაქორწინოთ სხვადასხვა პარტიები, პოლიტიკური ჯგუფები თუ პიროვნებები, ჩვენ უბრალოდ გვჭირდება, რომ მივაღწიოთ სისტემის შეცვლას ერთობლივი ქმედებებით. უნდა მივაღწიოთ იმას, რომ ევროკავშირმა მოახდინოს არჩევნების მონიტორინგი, ხმების დათვლაში პირდაპირი ჩართვა და მონაწილეობა. ჩვენ ევროკავშირს უნდა მივმართოთ თხოვნით, სტატუსიდან გამომდინარე, გაგვიხსნან ახალი საარჩევნო უბნები, რათა ემიგრანტები მივიდნენ და მისცენ ხმა. ჩემი თხოვნით წავიდნენ ვაშაძე, ცისკარიშვილი, ბოკუჩავა და ამერიკაში ხვდებიან ხალხს, სოფო ჯაფარიძე ევროპაში ხვდებოდა ხალხს. ჩვენ გვჭირდება ათჯერ მეტი ამომრჩევლის მოყვანა საზღვარგარეთ“, - განაცხადა სააკაშვილმა.

რაც შეეხება სისხლის სამართლის ამ საქმეს, სააკაშვილი აცხადებს, რომ რუსეთის პრეზიდენტის ვლადიმირ პუტინის ინიციატივით აღიძრა „7 ნოემბრის საქმე“ და ის პირადად პუტინის პატიმარია.

„დღევანდელ სასამართლოსთან პირდაპირ კავშირშია ის, რომ ვლადიმერ პუტინმა დსთ-ს ნარჩენების სხდომაზე პირდაპირ დამადანაშაულა, რომ დსთ მე დავუშალე. მე ვამაყობ იმით, რომ ამაში ნამდვილად მიმიძღვის წვლილი და ეს პირდაპირ უკავშირდებოდა იმ მოვალეობებს, რომელიც უკავშირდება იმ პერიოდს და რომელსაც თქვენ არჩევთ სისხლის სამართლის ე.წ საქმის განხილვისას“, - აღნიშნა სააკაშვილმა.