პროკურატურამ ყოფილი მეუღლის განზრახ მკვლელობის მცდელობისთვის პირი პასუხისგებაში მისცა

მთავარი პროკურატურის ინფორმაციით, 2017 წლის 1 დეკემბერს მოქალაქეს ყოფილი მეუღლის ანგარებით განზრახ მკვლელობის მცდელობის, პოლიციელის სამსახურებრივ საქმიანობასთან დაკავშირებით თავდასხმისა და სიცოცხლის მოსპობის მცდელობის ფაქტზე წარედგინა ბრალდება დანაშაულისათვის, რაც გათვალისწინებულია საქართველოს სსკ-ის 111,19,109-ე მუხლის მესამე ნაწილის „გ“ ქვეპუნქტით და  ამავე კოდექსის 19,3531-ე მუხლის მესამე ნაწილით.

"საქმეზე ჩატარებული გამოძიებით დგინდება, რომ უკვე განქორწინებულ ყოფილ მეუღლეებს შორის სამართლებრივი დავის დასრულებისა და შესაბამისი გადაწყვეტილების მიღების მიუხედავად, 2017 წლის 30 ნოემბერს საღამოს საათებში ბრალდებული მის ყოფილ მეუღლეს დახვდა თბილისში, ლუბლიანას ქუჩაზე ერთ-ერთ კორპუსში მდებარე მის საცხოვრებელ ბინასთან და იარაღის მუქარით სთხოვდა თანასაკუთრებაში არსებული საცხოვრებელი ბინის რეალიზაციის შედეგად მიღებული სრული თანხის დაუყოვნებლივ გადახდას, წინააღმდეგ შემთხვევაში ემუქრებოდა სიცოცხლის მოსპობით. 

ბრალდებულმა შემთხვევის ადგილზე მისულმა საპატრულო პოლიციის თანამშრომლებს ესროლა. მან დაჭრა ყოფილი მეუღლე. პატრულ-ინსპექტორის მხრიდან გახსნილი საპასუხო ცეცხლის შედეგად  თავდამსხმელი დაიჭრა."- ნათქვამია პროკურატურის განცხადებაში. 

დაკავებულს 6-იდან 20- წლამდე ვადით ან უვადო თავისუფლების აღკვეთა ემუქრება.