საპარლამენტო უმრავლესობაში საპოლიციო კონტროლს დადებითად აფასებენ

საქართველოს შინაგან საქმეთა სამინისტროს ინიციატივას საპოლიციო კონტროლის თაობაზე ეხმიანებიან პარლამენტში. პარლამენტის ადამიანის უფლებათა დაცვის კომიტეტის თავმჯდომარე სოფო კილაძე გიორგი გახარიას გადაწყვეტილებას დადებითად აფასებს.

"ჩვენ, როდესაც 2013 წელს დავიწყეთ მუშაობა პოლიციის შესახებ ახალ კანონზე მკაცრად გაიწერა საპოლიციო კონტროლი, როგორც ღონისძება, ეს კონტროლი არის დეტალურად გაწერილი კანონში და შესაბამისად, პირველი მიზანი ამ საპოლიციო კონტროლის არის პრევენცია, შესაბამისად, მგონია, რომ ეს პრევენციული ღონისძიებები იყო დროული. ვიცით, რომ რიგ დანაშაულებებს ჰქონდა ადგილი, მათ შორის დიდი ტრაგედია, რაც უკავშირდებოდა ბავშვებს, ამიტომ, ვიდრე, რაიმე შედეგი დადგება, უნდა ჩაერთოს პოლიცია. მგონია, ეს საპოლიციო კონტროლი, რომელის გუშინ შს მინისტრმა დააანონსა, არის მნიშვნელოვანი და დროული. მივესალმები, თუ ასეთი ღონისძებები პერიოდულად ჩატარდება,"- განაცხადა პარლამენტის ადამიანის უფლებათა დაცვის კომიტეტის თავმჯდომარე სოფო კილაძემ. 

პარლამენტის აგრარულ საკითხთა კომიტეტის თავმჯდომარე ოთარ დანელია დარწმუნებულია, რომ შინაგან საქმეთა სამინისტროს მხრიდან საპოლიციო კონტროლის განხორციელებისას ადგილი არანაირ გადაცდომას არ ექნება და თუ ექნება, შესაბამისი რეაგირება მოხდება.

„მინისტრისგან ძალიან აქტიური პროგრამა მოვისმინეთ და ეს პროცესიც ამ პროგრამის ნაწილია. ყველაზე მნიშვნელოვანია, რომ ეს ის პრევენციული ღონისძიებებია, რომელთაც დიდი დატვირთვა აქვს. ამ პროცესს მივესალმებით, რადგან ძალიან პოზიტიური მოვლენაა. რეფორმები, რომელზეც მინისტრმა ისაუბრა, ჩვენი ძალოვანი სტრუქტურების გასაჯანსაღებლად სასიცოცხლოდ მნიშვნელოვანია. პრევენციული ღონისძიებები ნიშნავს, რომ თავი მაქსიმალურად დავიზღვიოთ. დარწმუნებული ვარ, ადგილი არანაირ გადაცდომას არ ექნება და თუ ექნება, შესაბამისი რეაგირება იქნება”, – განაცხადა დანელიამ.

შინაგან საქმეთა სამინისტროში საგანგებო ბრიფინგი 22 დეკემბერს გაიმართა. კრიმინალური პოლიციის დეპარტამენტის მთავარი სამმართველოს უფროსის, მამუკა ჭელიძის განცხადებით, გუშინ დილის 8 საათიდან, სასამართლოს შესაბამისი განჩინების საფუძველზე, შსს-ს ცენტრალური კრიმინალური დეპარტამენტის და ტერიტორიული დანაყოფების თანამშრომლებმა დანაშულის პრევენციის მიზნით, საქართველოს სხვადასხვა რეგიონში, ოპერატიულ-საგამოძიებო ღონისძიებები ჩაატარეს.

შედეგად დაკავებულია 10 პირი, აქედან 6 წარსულში ნასამართლევია. ამოღებულია დიდძალი ცეცხლსასროლი იარაღი, საბრძოლო მასალა, ნარკოტიკული საშუალება. დაწყებულია საპოლიციო კონტროლი.