EMC საპოლიციო კონტროლის დაწყების წინააღმდეგია

“ადამიანის უფლებათა სწავლებისა და მონიტორინგის ცენტრი” (EMC) შსს-ს მიერ სპეციალური საპოლიციო კონტროლის დაწყების შესახებ განცხადებას ავრცელებს. ამის შესახებ ნეტგაზეთი წერს.

ორგანიზაციის თქმით, ღონისძიების ჩატარების საფუძვლად მხოლოდ ზოგადი სამსართლებრივი საფუძვლებია მითითებული და აბსტრაქტული საფუძვლებით მთელი ქვეყნის მასშტაბით საპოლიციო კონტროლის განხორციელება არაპროპორციული და არათანაზომიერი ჩარევაა მოქალაქეთა უფლებებში და ორგანიზაცია შს მინისტრის ბრძანებას გაასაჩივრებს საერთო სასამართლოებში:

“აბსტრაქტული საფუძვლებით, დანაშაულის ზოგადი პრევენციის მიზნით, 36 საათის განმავლობაში მთელი ქვეყნის მასშტაბით საპოლიციო კონტროლის განხორციელება, რა დროსაც ქვეყნის ტერიტორიაზე მყოფი ნებისმიერი პირი შეიძლება დაექვემდებაროს პოლიციის მხრიდან შემოწმებას, წარმოადგენს არაპროპორციულ და არათანაზომიერ ჩარევას მოქალაქეთა უფლებებში. აღსანიშნავია ისიც, რომ სამინისტროს გავრცელებულ ინფორმაციაში ჩანს, რომ ფაქტობრივად პოლიცია ერთდროულად ატარებს საგამოძიებო და პრევენციულ ღონისძიებებს, თუმცა, არ აკონკრეტებს, რა საქმის გამოძიების ფარგლებში მიმდინარეობს ამ მასშტაბის ღონისძიებები: პირების დაკავება, საცხოვრებელი სახლების ჩხრეკა და უკანონო ნივთების ამოღება” – ნათქვამია EMC-ის განცხადებაში.

ორგანიზაციის განცხადებაში ნათქვამია, რომ საპოლიციო კონტროლი, ისევე როგორც შეჩერება და ზედაპირული შემოწმება, არის პრევენციული ღონისძება და მათი გამოყენება არ უნდა ხდებოდეს დანაშაულის გამოძიების მიზნით.

მანამდე სახალხო დამცველმა ნინო ლომჯარიამ განაცხადა, რომ საპოლიციო შემოწმების დროს მნიშვნელოვანია, მოქალაქეებმა საკუთარი უფლებები იცოდნენ.

საპარლამენტო უმრავლესობაში საპოლიციო კონტროლს დადებითად აფასებენ.

" მგონია, ეს საპოლიციო კონტროლი, რომელის გუშინ შს მინისტრმა დააანონსა, არის მნიშვნელოვანი და დროული. მივესალმები, თუ ასეთი ღონისძებები პერიოდულად ჩატარდება,"- განაცხადა პარლამენტის ადამიანის უფლებათა დაცვის კომიტეტის თავმჯდომარე სოფო კილაძემ. 

პარლამენტის აგრარულ საკითხთა კომიტეტის თავმჯდომარე ოთარ დანელია დარწმუნებულია, რომ შინაგან საქმეთა სამინისტროს მხრიდან საპოლიციო კონტროლის განხორციელებისას ადგილი არანაირ გადაცდომას არ ექნება და თუ ექნება, შესაბამისი რეაგირება მოხდება.

შინაგან საქმეთა სამინისტროს ინფორმაციით, მიმდინარე წლის 22-23 დეკემბერს მთელი საქართველოს მასშტაბით, მათ შორის თბილისში, საპოლიციო კონტროლი და ოპერატიულ-საგამოძიებო ღონისძიებები განხორციელდა.

ღონისძიებების შედეგად სულ დაკავებულია 69 პირი, მათ შორის სისხლის სამართლის კოდექსით გათვალისწინებული დანაშაულის ჩადენისათვის 32, აქედან ცეცხლსასროლი იარაღის უკანონო შეძენა-შენახვა ტარებისთვის 6, ნარკოტიკების უკანონო შეძენა-შენახვისთვის - 12.

შინაგან საქმეთა სამინისტროში საგანგებო ბრიფინგი 22 დეკემბერს გაიმართა და განაცხადეს, რომ ქვეყანაში საპოლიციო კონტროლი დაიწყო