მალხაზ მაჩალიკაშვილი: ვინც ჩემს შვილს ესროლა, სანამ არ ჩამაბარებენ, არ გავჩერდები

„თუ ჩემი შვილი ამ მდგომარეობიდან არ გამოვა, მე სხვა გზას ავირჩევ“, -  ეს განცხადება სოფელ დუისში ჩატარებული სპეცოპერაციისას დაჭრილი თემირლან მაჩალიკაშვილის მამამ ცოტა ხნის წინ გააკეთა. 19 წლის ახალგაზრდის მდგომარეობა ამ დრომდე მძიმეა და ის თელავის რეფერალური საავადმყოფოს რეანიმაციულ განყოფილებაში რჩება.

მალხაზ მაჩალიკაშვილი ამბობს, რომ სპეცრაზმელებმა კარი შეამტვრიეს და მეორე სართულზე, იმ ოთახისკენ გაემართნენ, სადაც მისი შვილი იმყოფებოდა.

„ჩემი შვილი დილის ლოცვამდე არ იძინებდა, ჩვენთან დილის ლოცვა 04:30-ზე არის. ბავშვი იყო მაღალი, 198 სანტიმეტრი სიმაღლეში და წოლისას მხრებით საწოლის თავს იყო მიბჯენილი. როგორც ჩანს, ხელში ტელეფონი ეჭირა და თავში ნასროლია მწოლიარე მდგომარეობაში, ტყვია კედელშია ჩარჩენილი. ხმაურზე გამოვედი და მე ბეტონზე დამაგდეს, არ მიშვებდნენ ზევით. მესმოდა როგორ გამოიძახეს სასწრაფო და დაახლოებით 1 საათის შემდეგ თელავის საავადმყოფოში წაიყვანეს და დატოვეს, რადგან თბილისამდე ვერ ჩაიყვანდნენ“, - განაცხადა მალხაზ მაჩალიკაშვილმა. 

დაჭრილის მამა ასევე აცხადებს, რომ საავადმყოფოდან სოფელში მხოლოდ შვილთან ერთად დაბრუნდება.

„საავადმყოფოდან სოფელში დავბრუნდები, კარგი თუ ცუდი გზით მხოლოდ ჩემს შვილთან ერთად. თუ ჩემი შვილი ამ მდგომარეობიდან არ გამოვა, მე სხვა გზას ავირჩევ. ვეცდები სიმართლე დავადგინო სტრასბურგის სასამართლოს მეშვეობით. ეს ასე არ ჩაივლის. დღეს ჩემი შვილი სიკვდილს ებრძვის, ვინც ჩემს შვილს ესროლა, სანამ მას არ ჩამაბარებენ, არ გავჩუმდები, არ გავჩერდები. მე დავიწყებ რუსეთიდან, ევროპიდან, ალაჰის წყალობით, მყავს ხალხი, რომ ამ ამბავს ასე არ დავტოვებ", - ამბობს დაჭრილის მამა. 

მთავარმა პროკურატურამ სპეცოპერაციის დროს თემირლან მაჩალიკაშვილის დაჭრის ფაქტზე გამოძიება დაიწყო. 

თემირლან მაჩალიკაშვილი მკურნალობის კურსს ამ დრომდე თელავის რეფერალურ საავადმყოფოში გადის. ის ისევ მართვით სუნთქვაზე რეანიმაციულ განყოფილებაშია. მისი მდგომარეობა მძიმეა.

სუსის ცნობით, 26 დეკემბერს დაკავებული პირები 21-22 ნოემბრის სპეცოპერაციის დროს მოკლულ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსზე.