დაჭრილი მაჩალიკაშვილის ოჯახი სახალხო დამცველთან შეხვედრას ითხოვს

პანკისში დაჭრილი თემირლან მაჩალიკაშვილის ოჯახი სახალხო დამცველთან შეხვედრას ითხოვს. დაჭრილის ბებია, ელენე მაჩალიკაშვილი აცხადებს, რომ მის შვილიშვილს მძინარეს ესროლეს და რამდენიმე საათის შემდეგ გადაიყვანეს საავადმყოფოში. 

"ღამის 03:15 საათზე გავიგე საშინელი ხმა და მაშინ შევარდნენ მეორე სართულზე საძინებელში, სადაც ბავშვი იყო. კარიც კი არ იყო ჩაკეტილი, ამ შევარდნიდან რამდენიმე წამში გავიგე გასროლის ხმა. ეზო სავსე იყო სპეცრაზმელებით, გარეთ გამოსვლის საშუალებას არ გვაძლევდნენ. ჩემი შვილი და რძალი ძირს იყვნენ დაწვენილები და ნიღბიანი სპეცრაზმელებით გაივსო ეზო. ვითხოვდით, რომ ბავშვი ენახებინათ, ის სიკვდილს ებრძოდა. სროლის შემდეგ არანაირი ხმა არ გაგვიგია მისი, კვნესაც არ გაგვიგია და ალბათ დილის 08:00 საათი იქნებოდა, საკაცით რომ ჩამოიყვანეს და წაიყვანეს. შუბლი აქვს გახვრეტილი ბავშვს. ვითხოვ სახალხო დამცველთან შეხვედრას, რომ მოვუყვეთ ყველაფერი",- განაცხადა ელენე მაჩალიკაშვილმა. 

ოთახში, სადაც თემირლან მაჩალიკაშვილი დაჭრეს, ერთი ნატყვიარი საწოლზეა, რომელიც გავლით კედელზე მოხვდა. სამართალდამცველებმა სხვა მასალებთან ერთად კედლის ის ნაწილიც ამოჭრეს და ექსპერტიზაზე გადაიტანეს, სადაც ნასროლი ტყვიის ფრაგმენტები იყო ჩარჩენილი.

პანკისში ჩატარებული სპეცოპერაციის დროს ერთ-ერთი ეჭვმიტანილი თემირლან მაჩალიკაშვილი დაიჭრა. ამ ფაქტს პანკისის ხეობაში უარყოფითად აფასებენ და ამბობენ, რომ სპეცრაზმმა ძალას გადაამეტა. მათ ხელისუფლების სახელზე სპეციალური მიმართვაც გააგზავნეს. პანკისის ხეობის სოფელ დუისში ჩატარებული სპეცოპერაციისას დაჭრილი თემირლან მაჩალიკაშვილის საქმის გამოუძიებლობის შემთხვევაში ადგილობრივების ნაწილი საპროტესტო აქციებს აანონსებს.

პანკისსა და თბილისში ჩატარებული სპეცოპერაციის დროს სუსმა 5 პირი დააკავა. თბილისის საქალაქო სასამართლომ პანკისში სპეცოპერაციის დროს დაკავებულ ზურაბ გორნაკაშვილს პატიმრობა დღეს შეუფარდა. 

ბრალდების მიხედვით, დაკავებულები, სავარაუდოდ, აჰმედ ჩატაევის მოკავშირეები იყვნენ, ისინი დაეხმარნენ ჩატაევს საქართველოს საზღვარზე გადმოსვლასა და თბილისში ბინის ქირაობაში, სადაც 21-22 ნოემბერს სპეცოპერაცია ჩატარდა. დაკავებულებს ბრალი უკვე  წარედგინათ. 

სუსის ცნობით, დაკავებული პირები 21-22 ნოემბრის სპეცოპერაციის დროს მოკლულ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსზე.