თბილისის საქალაქო სასამართლოში ოთხი ოქტომბრის საქმეზე ბრალდებულების მურთაზ ზოდელავას, ირაკლი ნადირაძის, პაატა მანჯგალაძის, პაატა ბურჭულაძის, ლაშა ბერიძისა და კიდევ ხუთი პირის სასამართლო პროცესი გაიმართა

თბილისის საქალაქო სასამართლოში ოთხი ოქტომბრის საქმეზე ბრალდებულების მურთაზ ზოდელავას, ირაკლი ნადირაძის, პაატა მანჯგალაძის, პაატა ბურჭულაძის, ლაშა ბერიძისა და კიდევ ხუთი პირის სასამართლო პროცესი გაიმართა. დღევანდელ სხდომაზე დაცვის მხარის ნაწილმა მოსამართლეს დასკვნითი სიტყვით მიმართა.

დაკავებულებს პროკურატურა ედავება სტრატეგიული ობიექტების ხელში ჩაგდების და ბლოკირების მცდელობას ჯგუფურად. მათ, ასევე, ბრალი წარდგენილი აქვთ ჯგუფური ძალადობის ორგანიზებასა და საქართველოს კონსტიტუციური წყობილების ძალადობით შეცვლისკენ მოწოდებისთვის.

„მე ამ აქციის ორგანიზატორი არ ვყოფილვარ. პრეზიდენტის სასახლესთან ან რამე მიმართულებით გადაადგილების შესახებ ჩემთვის ინფორმაცია ცნობილი არ იყო. როგორც გამომსვლელების სიტყვები, ასევე მისი ტექსტები ჩემთვის არავის შეუთანხმებია. არათუ რამე ძალადობრივი აქციის, არამედ მშვიდობიანი აქციის ორგანიზატორიც არ ვყოფილვარ“, - განაცხადა პაატა მანჯგალაძემ.

პროკურორ თამარ ბეჟუაშვილის თქმით, სახელმწიფო ხელისუფლების დამხობის მცდელობის საქმეზე დაკავებულ პირთა სასამართლო სხდომები დასასრულს უახლოვდება.

„ბრალდების მხარემ სასამართლოს წინაშე სრულყოფილად გამოიკვლია ის მტკიცებულებები, რომლებიც წარვადგინეთ სასამართლოს წინაშე. შესაბამისად, მოლოდინი გვაქვს, რომ სასამართლო გამოიტანს გამამტყუნებელ განაჩენს“, - აღნიშნა მან.