ეკა კუპატაძე: ახლავე წაიყვანონ, ექსპერტიზა ჩაუტარონ ნია იმნაძეს, არ შევარჩენ არავის. ვერ დამემალებიან მაშინ, როდესაც მე ზურგს მიმაგრებს სახელმწიფო. დიახ, დღეს ქალბატონი ქეთი სონიძე იყო პრინციპული

გიგა ავალიანის საქმეზე მოწმე ნია იმნაძე სასამართლოში იძულების წესით მიიყვანეს, თუმცა დაკითხვამდე განაცხადა, რომ თავს შეუძლოდ გრძნობს და სხდომა დატოვა.

სახელმწიფო ბრალდება ამბობს, რომ იმნაძე პირდაპირ უკავშირდება გიგა ავალიანზე თავდასხმის მოტივს. როგორც ბრალდების მხარე აცხადებს, იმნაძესთან კრიტიკული კითხვები ჰქონდათ მომზადებული თუმცა მას შემდეგ რაც მოწმეს მოსამართლემ სახელი, გვარი და მისამართი ჰკითხა, მან განაცხადა, რომ თავს შეუძლოდ გრძნობს.

ადვოკატებმა იმნაძის ჩვენება უდავოდ ცნეს, რაც იმას ნიშნავს, რომ იმნაძის დაკითხვა დღის წესრიგიდან მოიხსნა.

გიგა ავალიანის დედა დარწმუნებულია, რომ ნია იმნაძემ შეუძლოდ ყოფნა „გაითამაშა“.

„მას შემდეგ, როგორც გითხარით, რაც უკვე მოხდა იდენტიფიცირება მოწმისა, მოწმემ გასცა პირველ ორ კითხვას პასუხი, მოითხოვა ექიმი, შემოვიდა ექიმი და აი, ამ პერიოდში ვიდრე ექიმი შემოვიდოდა ადვოკატებმა უდავოდ გაუხადეს ჩვენებები ნია იმნაძეს. სად იყვნენ მანამდე, ხომ იცოდნენ რომ არასრულწლოვანი მოდიოდა იძულების წესით.

ახლავე წაიყვანონ, ექსპერტიზა ჩაუტარონ ნია იმნაძეს, არ შევარჩენ არავის. ვერ დამემალებიან მაშინ, როდესაც მე ზურგს მიმაგრებს სახელმწიფო. დიახ, დღეს ქალბატონი ქეთი სონიძე იყო პრინციპული“, - განაცხადა ეკა კუპატაძემ.