გირგვლიანის საქმეზე პროკურორმა ერთ-ერთი მსჯავრდებულის ჩვენება გამოაქვეყნა

სანდრო გირგვლიანის საქმეში ბრალდებულის, დათა ახალაიას პროცესზე, საქმის პროკურორმა გირგვლიანის მკვლელობაში ერთ-ერთი მსჯავრდებულის, ალექსანდრე ღაჭავას ჩვენება გამოაქვეყნა.

ჩვენების მიხედვით, 2006 წლის 28 იანვარს, ღამით სახლში იყო, როდესაც გია ალანიამ დაურეკა და უთხრა სახლის წინ დახვედროდა, ღონისძიებაზე მიდიოდნენ. თავისუფლების მოედანზე ორი ახალგაზრდა ჩაისვეს ავტომანქანაში და ოქროყანაში წავიდნენ. ლევან ბუხაიძემ გააპროტესტა სასაფლაოებთან მათი მიყვანის ფაქტი. გინება დაიწყო და ალანიას ფიზიკურად დაუპირისპირდა.

ღაჭავას ჩვენებით, ის  სანდრო გირგვლიანის ინციდენტს თვალყურს შორიდან ადევნებდა. გირგვლიანმა და ბუხაიძემ მათი მოთხოვნით, ქურთუკი და სვიტერი გაიხადეს. გირგვლიანი სასაფლაოებისკენ გაექცათ, რის შემდეგაც ოქროყანის ტერიტორია დატოვეს და სახლებში წავიდნენ.

ღაჭავა ჩვენებაში აღნიშნავს, რომ ახალგაზრდების ოქროყანაში გატაცების დროს ალანიას დათა ახალაიასთან ჰქონდა სატელეფონო კავშირი. მისივე ჩვენების მიხედვით, სამი დღის შემდეგ ალანიამ შეატყობინა, რომ გირგვლიანი რომელიც გაექცათ, გარდაიცვალა. გარკვეული პერიოდის შემდეგ კი დათა ახალაიამ მათ სთხოვა, რომ ციხეში წასულიყვნენ და მათ ოჯახებს უპატრონებდა. მათაც პრივილეგიებს შეუქმნიდა და მალე გათავისუფლდებოდნენ.

ღაჭავას ჩვენებით, დათა ახალაიამ აგვისტოს ომის პერიოდში 100 000 დოლარი მისცა. დაწესებულება დატოვეს, თუმცა თავად ომში არ ყოფილა. მოგვიანებით, ალანიამ ახალაიასთან ერთად ცხინვალის ომში გადაღებული ფოტო აჩვენა, რის შემდეგაც მიხვდა, რომ ალანია ომში იყო. ერთ კვირაში დაურეკეს და უთხრეს, რომ პრეზიდენტის შეწყალება ჯერ არ გამოდიოდა და ამიტომ სახლიდან ისევ ავჭალის ციხეში უნდა დაბრუნებულიყვნენ.

როგორც ღაჭავა ამბობს, 2009 წელს, შეწყალების შემდეგ ახალაია მის ოჯახს ყურადღებას აღარ აქცევდა და გადაწყვიტა სამსახური დაეწყო და სატრანსპორტო კომპანიაში დასაქმდა.  ის კუდში დაიბარეს და დათა ახალაია სხვა თანამშრომლებთან ერთად ფიზიკურად გაუსწორდა. გააფრთხილა, რომ არც კი გაებედა სამსახურის დაწყება.

ღაჭავას თქმით, დანაშაული მას არ ჩაუდენია და სასჯელს დაუმსახურებლად იხდიდა. ღაჭავა გამოძიებაში დაიკითხა, თუმცა ახლა საქართველოში აღარ არის და მისი ჩვენება პროკურორმა წერილობით წარადგინა.

ცნობისთვის, 5 იანვარს, მოსამართლე გიორგი არევაძემ სანდრო გირგვლიანის საქმეზე მიხეილ სააკაშვილი დამნაშავედ ცნო.