4 ოქტომბრის საქმეზე ბრალდებულებს გიორგი ჩახუნაშვილს, კონსტანტინე კოკაიას, დავით სტურუას, კახაბერ მჟავანაძეს, დავით ჟღენტს, ზაქრო ალბუთაშვილს და ია დარახველიძეს 5-5-წლიანი პატიმრობა მიესაჯათ

4 ოქტომბრის საქმეზე ბრალდებულებს გიორგი ჩახუნაშვილს, კონსტანტინე კოკაიას, დავით სტურუას, კახაბერ მჟავანაძეს, დავით ჟღენტს, ზაქრო ალბუთაშვილს და ია დარახველიძეს 5-5-წლიანი პატიმრობა მიესაჯათ.

გადაწყვეტილება მოსამართლე გიორგი გელაშვილმა მიიღო. ექიმი გიორგი ჩახუნაშვილი, რომელიც გირაოს სანაცვლოდ იყო გათავისუფლებული, სხდომათა დარბაზში დააკავეს. ია დარახველიძე კი, რომელიც ასევე გირაოს სანაცვლოდ იყო გათავისუფლებული, განაჩენის გამოცხადებას არ დასწრებია. მის მიმართ ძებნა გამოცხადდება და მოსამართლის მიერ გამოტანილი განაჩენი მისი ადგილსამყოფელის დადგენისა და დაკავების შემდეგ აღსრულდება.

“ერთი პროცენტი გაქვთ დარჩენილი. სანამ ჯადოსნურ ჩაქუჩს დაარტყამ, თკარგად დაფიქრდით, ძალიან ცუდად იქნება ყველაფერი”, - მიმართა ბრალდებულმა ზაქრო ალბუთაშვილმა მოსამართლეს განაჩენის გამოცხადებამდე.

კახა მჟავანაძემ კი თქვა, რომ დანაშაული არ ჩაუდენია და მხოლოდ ღობეს აჯანჯღარებდა. “არ ჩამიდენია არაფერი, ღობეს ვაჯანჯღარებდი… აი, რო მომისჯით, ხომ გამოვალ, მოვალ თქვენთან სახლში, მივესალმები თქვენი ოჯახის წევრებს, როცა იქნება, ხომ გამოვალ და ვეტყვი, რომ ამის გამო გამიშვა ციხეში თქვენი ოჯახის წევრმა”, - აღნიშნა პროცესზე მჟავანაძემ.

„არ ვაღიარებ არაფერს, ქალაქელი კაცი ვარ, სარკეში ჩაიხედეთ, რას გავხართ. მომისჯიით?! გამოვალ, მოგაკითხავთ სახლში, თვალებში ჩაგხედავთ, გაიგეთ, ბატონო პროკურორო?!”, - თქვა კონსტანტინე კოკაიამ განაჩენის გამოცხადებამდე.

ცნობისთვის, ყველა მათგანს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით აქვთ წარდგენილი, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს, ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილითაც აქვთ წარდგენილი, რაც ჯგუფურ ძალადობაში მონაწილეობას გულისხმობს.